Новак Ѓоковиќ верува дека Вимблдон би можел да биде неговата најдобра шанса да ја додаде рекордната 25-та Гренд слем титула во кариерата, додека се подготвува за својот 20-ти настап на турнирот.
Србинот, кој седум пати го крена трофејот во поединечна конкуренција, испадна од Отвореното првенство на Франција во полуфиналето откако загуби од првиот светски рекет Јаник Синер.
На 38 години, Ѓоковиќ има за цел да стане најстариот Гренд слем шампион, а со својата претходна форма на Вимблдон, тој го гледа претстојниот турнир како одлична можност да го стори тоа.
Ѓоковиќ, ќе игра во првото коло на Вимблдон против Французинот Александар Милер (АТП-40)
-Мојата желба е да играм уште неколку години, па затоа би сакал да бидам физички подготвен, а исто така и ментално мотивиран за да продолжам да бидам на највисоко ниво. Тоа е целта, но никогаш не се знае во оваа фаза. Веројатно би се согласил дека Вимблдон би можел да биде најдобрата шанса за 25-та Гренд Слем титула поради резултатите што ги имав, поради тоа како се чувствувам, како играм на Вимблдон – едноставно добивам дополнителен ментален поттик и мотивација да го играм мојот најдобар тенис на највисоко ниво. Дали ова би можело да биде мојот последен танц, не сум сигурен, исто како што не сум сигурен за Ролан Гарос или за кој било друг Гренд Слем турнир на кој ќе играм следно, изјави Ѓоковиќ.
Во подоцнежните фази од својата кариера, Србинот се фокусираше помалку на рангирањето, а повеќе на своите настапи на Гренд Слем, пристап што му овозможи филозофски да гледа на поразите на помалите турнири.
-Би рекол дека сега е малку поинаку за мене, бидејќи повеќе не бркам рангирање. Се обидувам да го играм мојот најдобар тенис на Гренд Слем турнирите и да освојувам Гренд Слем турнири. Тоа не се променило. Моето ниво беше нагоре-надолу и беше многу понепредвидливо отколку што беше во поголемиот дел од мојата кариера. Ако ги погледнете последните година и пол, моите резултати беа прилично неконзистентни. Гренд слем турнирите беа прилично конзистентни. Освен на Отвореното првенство на САД минатата година, стигнував до четвртфиналето или полуфиналето. Тоа е добар знак затоа што тоа е она што го сакам. Тие турнири ми даваат најголем поттик. Играв две полуфиналиња оваа година. За жал, во Австралија морав да се повлечам, а на Ролан Гарос загубив од Синнер. Мислам дека сè уште играв пристојно ниво на тенис, што ми покажа дека сè уште можам да играм на многу високо ниво во подоцнежните фази, заклучи Ѓоковиќ.
Двократниот шампион на Вимблдон и бранител на титулата, Карлос Алкараз, е полн со самодоверба додека се подготвува за турнирот и се стреми кон трета победа по ред во сингл.
Шпанецот е во одлична форма откако го победи Јаник Синер во маратонско финале за да ја одбрани титулата на Отвореното првенство на Франција, а потоа победи во „Квинс Клуб“ во Лондон по втор пат.
Иако трета победа по ред би го ставила меѓу елитна група од повеќекратни последователни шампиони, засега неговиот фокус останува на самиот триумф.
-Доаѓам тука мислејќи дека навистина сакам да ја освојам титулата, навистина сакам да го кренам трофејот. Не мислам колку играчи го направиле тоа, освојувајќи три титули на Вимблдон по ред. Мислам дека сум подготвен на најдобар можен начин. Сакам да го започнам турнирот со многу самодоверба. Очигледно се чувствувам самоуверен во моментов. Турнирот сè уште не започнал, две недели би можеле да бидат навистина долги, но во моментов не размислувам кому би можел да се придружам ако освојам три титули по ред, изјави Алкараз.
Алкараз ќе ја почне одбраната на титулата против Италијанецот Фабио Фоњини.
