Компанијата „СпејсИкс“ на милијардерот Илон Маск успешно ја лансираше ракетата „Супер Хеви-Старшип“ на пробен лет, по два дена одложување, објави Си-Би-Ес њуз.
Овој пробен лет е оценет како исклучително успешен, особено по трите последователни неуспеси претходно оваа година.
Иако за време на враќањето на ракетата беше оштетено заштитното „здолниште“ околу моторите на горниот степен на „Старшип“, леталото остана под контрола и успешно слета во Индискиот Океан, согласно планот.
„Потврдено слетување на вода! Честитки до целиот тим на ‘СпејсИкс’ за возбудливиот десетти пробен лет на ‘Старшип’“, објави „СпејсИкс“ на платформата Икс.
Првиот степен на ракетата, „Супер Хеви“, функционираше според планот и се врати кон брегот на Тексашкиот Залив за да изврши слетување.
Првиот обид за лансирање во неделата беше откажан поради технички проблеми, додека вториот обид во понеделникот беше спречен поради облачно време.
За НАСА, овие пробни летови се клучни, бидејќи планира да користи модифицирана верзија на „Старшип“ за мисијата за испраќање астронаути на Месечината во 2027 година. За таа цел, „СпејсИкс“ ќе мора да изврши повеќе летови со супертешки танкери за да ги наполни резервоарите на „Старшип“ со потребното гориво за мисијата. Според експертите, слетувањето на Месечината со ракета висока 16 ката претставува предизвик, особено поради нерамниот терен кој може да предизвика превртување.
