Иранскиот министер за надворешни работи Абас Арагчи го обвини Западот за молчење околу израелскиот нуклеарен арсенал, наведувајќи дека тоа ја нарушува кредибилноста на западните земји.
– Иран постојано предупредувал дека западната хистерија околу нашиот нуклеарен програм е вештачка, изјави Арагчи. Тој додаде дека Западот не го смета проблематично само ширењето на нуклеарното оружје, туку и тоа „кој има право на научен напредок, дури и во рамки на мирнодопски програми“.
Тој нагласи дека „смртната тишина“ околу развојот на „единствениот нуклеарен арсенал во регионот“, во рацете на „геноциден сојузник“, ја доведува западната политика во позиција без кредибилитет да зборува за неширење на оружјето.
Преговорите меѓу Иран и Меѓународната агенција за атомска енергија (МААЕ) почнаа денеска. Во петокот Арагчи се сретна со високата претставничка на ЕУ за надворешна политика и безбедност Каја Калас во Доха. Ова доаѓа по рокот од еден месец што Велика Британија, Франција и Германија (групата Е3) му го дадоа на Иран да се вклучи во преговорите, во спротивно ќе бидат обновени санкциите предвидени со нуклеарниот договор од 2015 година.
ОН го оценија овој период како „прозор на можности“ за дипломатско решение.
