Во пресрет на Генералната дебата на 80-то Генерално собрание на Обединетите нации, иницијативата „Сите за Палестина“ испрати писмо до претседателката Гордана Сиљановска-Давкова со барање нејзините настапи и гласања да бидат „во согласност со вредностите и историјата на народот во Македонија“.
Темата на годинешната дебата е „Подобри заедно: Повеќе од 80 години за мир, развој и човекови права“. Сиљановска во видео-порака по повод 80-годишнината од основањето на ОН порача:
„Оваа 80 годишнина е повик за будење за да ја потврдиме нашата посветеност на Повелбата на ОН и нејзиниот меѓународен поредок заснован на правила. Од нас зависи дали ОН ќе се справат со предизвиците и ќе продолжат да градат иднина на мир, правда и напредок на здрава планета.“
Иницијативата реагира дека овие зборови не соодветствуваат со досегашното однесување на државата.
„Точно, од нас зависи! Но, како придонесувате Вие и останатите претставници на нашата држава кон градење мир, правда и напредок на здрава планета? Македонија гласа воздржано за клучни прашања поврзани со најголемото злосторство на денешницата – геноцидот и екоцидот кој Израел веќе две години, активно и секојдневно, го врши врз палестинското население во Газа,“ се наведува во писмото.
Од „Сите за Палестина“ додаваат дека „зборовите се празни доколку не се проследени со конкретни чекори“ и бараат Македонија да преземе јасна позиција.
„Како ги оправдувате своите постапки? Како народна иницијатива која веќе две години се залага за Македонија да покаже солидарност со палестинскиот народ, Ве потсетуваме дека во ОН гласате во името на граѓаните,“ истакнуваат тие.
Во писмото до претседателката, иницијативата наведува конкретни барања:
Македонија јавно и веднаш да го осуди геноцидот врз палестинскиот народ и да ја признае Палестина;
Итно да се побара прекин на огнот и влез на хуманитарна помош во Газа што не е дистрибуирана од Израел;
Македонија да гласа „за“ на сите понатамошни гласања во ОН во корист на палестинскиот народ;
Да се воведат санкции кон Израел, да престане признавањето на Израел и да се стопира трговската, културната, образовната и спортската соработка;
Да се врати надворешната политика „во рацете на народот во духот на солидарност, а не во духот на личен профит“.
На крај, иницијативата ја потсетува Сиљановска на историскиот контекст:
„Токму на ова Генерално собрание, во октомври 1963 година, Скопје го доби називот ‘градот на светската солидарност’. Каде е ‘градот на светската солидарност’ сега? Како претседателка на државата, оправдајте го овој назив! Тоа е вашата историска должност.“
