Министерот за одбрана на САД, Пит Хегсет, денеска разговараше со своите кинески и индиски колеги, започнувајќи серија средби еден на еден на маргините на форумот за одбрана на самитот на Здружението на земјите од Југоисточна Азија (АСЕАН) во Малезија.
Средбата со кинескиот министер за одбрана, која следеше по телеконференција во септември, е најновиот знак за постепено подобрување на одбранбената комуникација меѓу САД и Кина, во услови на ескалација на регионалните тензии и растечкото воено присуство во Источна Азија.
Хегсет објави на „X“ дека му рекол на својот кинески колега, Донг Чунг, дека САД „решително ќе ги бранат своите интереси“ и ќе ја одржат рамнотежата на моќ во Индо-пацифичкиот регион, изразувајќи загриженост за активностите на Кина во спорното Јужнокинеско Море и околу Тајван. Шефот на Пентагон ја опиша средбата како „добра и конструктивна“.
-Ќе продолжиме со дискусиите со Народноослободителната армија за прашања од заеднички интерес. Соединетите Американски Држави не бараат конфликт. Ќе продолжат цврсто да ги бранат своите интереси и да обезбедат дека ги имаат потребните капацитети во регионот за тоа, додаде тој.
Според кинеското Министерство за одбрана, министерот Донг Чунг му рекол на Хегсет дека САД треба да бидат претпазливи и во реториката и во постапките во врска со Тајван и да заземат јасен став против неговата „независност“.
Министерството го цитираше Донг како вели дека Кина е посветена на мирен развој, а воедно решително ги штити своите национални безбедносни интереси.
-Кина има целосен капацитет мирно да одговори на какви било прекршувања или провокации, се вели во соопштението на министерството.
Вчера, американскиот претседател Доналд Трамп изјави дека прашањето за Тајван не било дискутирано за време на неговата средба со претседателот Си Џинпинг во јужнокорејскиот град Бусан. Во официјалната изјава на Кина, исто така, не се споменува Тајван.
Хегсет рече дека изразил загриженост и за постапките на Кина кон регионалните сојузници и партнери на Вашингтон – очигледна референца за повторените судири со Филипините во Јужното Кинеско Море и тензиите со Австралија околу летовите за надзор.
Пентагон се залага за подобрена комуникација со Кина додека ги модернизира своите вооружени сили и своите регионални позиции.
Според кинеското министерство за одбрана, Донг му рекол на Хегсет дека состанокот Трамп-Си обезбедил стратешки насоки за подобрување на одбранбените врски и дека сега треба да се преземат практични чекори.
Во Куала Лумпур, Хегсет, исто така, ја поздрави новата 10-годишна рамка за одбранбена соработка потпишана со индискиот министер за одбрана Раџнат Синг како „камен-темелник за регионална стабилност и одвраќање“.
Ова е значаен чекор напред за вооружените сили на нашите две земји, мапа на патот за подлабока и позначајна соработка, изјави Хегсет за новинарите по потпишувањето.
Хегсет и Синг се среќаваат за прв пат откако САД воведоа царина од 50 проценти на индиските стоки во август како казна за купувањето руска нафта од Делхи. Царините ја натераа Индија да престане со купувањето на американска одбранбена опрема, а се очекуваше двете страни денеска да разговараат за плановите за воена набавка на Индија.
Се очекува Хегсет да се сретне со министрите за одбрана на Индонезија, Филипините, Тајланд и други земји. На состанокот на министрите за одбрана на АСЕАН присуствуваат делегации од Австралија, Нов Зеланд, Јужна Кореја и Русија.
