Западна Европа се подготвува за нов бран снег и мраз додека бурата Горети напредува по атлантскиот брег на континентот.
Во Париз и северна Франција, обилните снежни врнежи предизвикаа сериозни прекини во сообраќајот. Автобускиот превоз во главниот град е во прекин, а властите забранија движење за камиони и училишни автобуси во една третина од административните департмани. Се очекува јужниот дел на Велика Британија да биде најсилно погоден утре и задутре.
Холандската авиокомпанија КЛМ откажа 600 летови на аеродромот Схипхол во Амстердам, додека француската цивилна авијација го намали бројот на полетувања од аеродромите „Шарл де Гол“ и „Орли“.
Властите ги советуваа граѓаните да работат од дома, додека трговските синџири, како „Карфур“, предупредуваат на можни прекини во синџирите на снабдување, особено при испораката на свежи производи.
Метеоролошките служби во Франција и Британија издадоа жолти и портокалови предупредувања за мраз и снег. Британскиот Метеоролошки завод соопшти дека предупредувањата ќе останат во сила во Шкотска, додека во поголемиот дел од Англија и Велс се очекува постепено смирување на состојбата.
