Пратеникот на Социјалдемократски сојуз на Македонија (СДСМ), Борче Цветков, на денешната собраниска седница за пратенички прашања упати прашање до министерот за економија и труд, Бесар Дурмиши, во врска со минималната плата и економската состојба на работниците.
„Во изминатиот период сме сведоци на континуиран раст на цените на основните животни производи. Храната поскапува, сметките растат, а инфлацијата директно го јаде и она малку што работниците го добиваат на крајот на месецот“, истакна Цветков.
Тој посочи дека минималната плата не го следи растот на трошоците за живот и дека илјадници семејства се соочуваат со финансиска неизвесност.
„Денес ниту три минимални плати не се доволни за покривање на основните животни потреби. Инфлацијата од 4,1 проценти и вртоглавиот раст на цените го загрозуваат животниот стандард, додека платите стојат во место“, рече Цветков.
Според него, минималната плата одамна не обезбедува достоинствен живот.
„Зборуваме за плата од која треба да се платат кирија или кредит, сметки за струја и греење, храна, лекови, училишни потреби и превоз. Кога сето тоа ќе се собере, станува јасно дека минималната плата одамна не обезбедува ниту минимум достоинство“, нагласи пратеникот.
Цветков ја критикуваше Владата за приоритетите во економските политики.
„Постојано зборувате за економски раст и стабилни индикатори, но прашањето е – за кого е тој раст? Секако не е за работникот кој живее од минимална плата. Тоа не е економска стабилност, тоа е сиромаштија“, изјави тој.
Тој додаде дека економијата не треба да се мери според бројот на тендери, туку според квалитетот на животот на граѓаните.
„Економијата не се мери во број на тендери, туку во квалитетот на животот на работниците, а денес тој е на самото дно“, рече Цветков.
На крајот, пратеникот на СДСМ нагласи дека зголемувањето на минималната плата е неопходно.
„Барањето за зголемување на минималната плата на 600 евра, како и 100 евра зголемување во останатите сектори, е оправдано и неопходно. Секој работник заслужува достоинствена плата за живот“, изјави Цветков, прашувајќи го министерот дали ќе го поддржи ова барање.
