Кога ќе помислиме на бизнис-империите на славните, најчесто ни паѓаат на ум парфеми, козметика или модни линии. Но, во последната деценија, една индустрија тивко – а потоа и експлозивно – стана нивна омилена територија: долната облека. Денес, тоа не е само моден производ, туку културна порака, политички став и економски феномен.
Најновото име во оваа приказна е Сидни Свини, која со својот бренд Syrn јасно порача дека новата генерација ѕвезди не сака само да биде лице на кампања – туку сопственик на наративот.
Од „секси имиџ“ до контрола врз сопственото тело
Долната облека отсекогаш била поврзана со погледот на другите. Токму затоа славните ја препознаа како простор каде можат да го превртат односот на моќ.
Со Syrn, Свини не продава само чипка или удобни кроеви – таа продава право на избор: дали ќе бидеш заводлива, романтична, разиграна или целосно комфорна. Пораката е јасна: жената не мора да биде една верзија од себе.
View this post on Instagram
Токму тука се надоврзува и Ким Кардашијан со Skims – бренд што од shapewear направи глобален бизнис, притоа менувајќи го разговорот за телесна разновидност. Skims не ветува „совршено тело“, туку облека што се прилагодува на реалното тело. Новата колекција која како да дојде како одговор на Сиднеј Свини, можеби и не го потврдува тоа.
Ријана и моментот кога underwear стана револуција
Ако постои момент кога индустријата дефинитивно се смени, тоа е појавата на Savage X Fenty на Ријана. Нејзините ревии повеќе личат на културен настан отколку на модна презентација. Различни тела, родови и идентитети – долната облека стана платформа за инклузивност, а не за исклучување.
Ријана покажа дека lingerie не мора да биде „тајна“, туку јавен став. И токму затоа брендот стана милијардерски, без класичните маркетинг формули.
Луксуз, минимализам и машки агол
На спротивниот крај од спектарот е Викторија Бекам, која ја внесе естетиката на high-fashion во долната облека – тивка, минималистичка и луксузна. Кај неа нема спектакл, туку контрола и прецизност.
Во машкиот сегмент, Дејвид Бекам одамна покажа дека underwear може да биде симбол на модерна машкост – функционална, но и естетски силна. Неговите кампањи со H&M станаа дел од поп-културната меморија.
Зошто токму долна облека?
Затоа што тоа е најинтимниот моден избор. Кога славните продаваат долна облека, тие не продаваат тренд – туку доверба.
Во време на социјални мрежи, телесна несигурност и постојана изложеност, овој тип брендови нудат нешто повеќе од материјал: чувство на прифаќање.
Новата ера: од бренд до културен став
Појавата на Сидни Свини не е изолиран случај, туку знак дека следната генерација холивудски ѕвезди ја гледа модата како алатка за самодефинирање, а не како споредна активност. Долната облека стана симбол на тоа кој зборува за телото – индустријата или жената сама.
И токму затоа, ова не е само модна приказна. Ова е приказна за моќ, контрола и современа поп-култура – скриена таму каде што најмалку очекувавме: во долната фиока.
Редакција Фронтлајн
