Долгометражниот филм „Shame and Money“, во режија на Висар Морина, кој е поддржан од Агенцијата за филм на Република Северна Македонија, беше избран во Официјалната селекција на Sundance Film Festival 2026, во категоријата World Dramatic Competition, каде што ја освои и највисоката награда – The World Cinema Grand Jury Prize: Dramatic.
Светската премиера на филмот се одржа на 25 јануари 2026 година.
„Shame and Money“ е меѓународна ко-продукција на продукциски компании од Германија, Косово, Словенија, Македонија и Албанија. Филмот е напишан и режиран од Висар Морина, со ко-сценаристка Дорунтина Баша, а од Македонија продуцент е Марија Димитрова, преку продукциската куќа List Production.
Проектот е поддржан од Комесаријатот за култура и медиуми на Германија, Косовскиот кинематографски центар, Eurimages – Совет на Европа, Германскиот федерален филмски фонд, Film- und Medienstiftung NRW, Словенечкиот филмски центар, Националниот центар за кинематографија на Албанија, Агенцијата за филм на Република Северна Македонија, како и преку белгиската Tax Shelter програма.
Sundance Film Festival 2026 се одржа во периодот од 22 јануари до 1 февруари 2026 година, во Парк Сити и Солт Лејк Сити, Соединетите Американски Држави.
Со ова значајно меѓународно признание, Македонија уште еднаш го потврдува своето континуирано и забележливо присуство на еден од најреномираните светски филмски фестивали, при што македонскиот филм веќе неколку години по ред се вбројува меѓу добитниците на награди на Sundance.
