Претставата „Кокошка“, која е копродукција помеѓу независната театарска група „Вортекс“ и „Театар Комедија“, ги освои двете најзначајни награди на јубилејното десетто издание на Интернационалниот театарски фестивал во Приштина (PITF), кое се одржа од 18 до 23 мај.
Наградата за најдобро актерско остварување на фестивалот ѝ припадна на Билјана Драгиќевиќ Пројковска за нејзината улога на Ала, додека „Кокошка“ беше овенчана со главната награда за најдобра претстава на фестивалот.
Исклучителна актерска зрелост и современ театарски јазик
Во образложението на стручното интернационално жири се истакнува дека изведбата на Билјана Драгиќевиќ Пројковска се одликува со исклучителна актерска зрелост, храброст и прецизност во изразот. Според оценките на жирито, нејзината интерпретација е „апсолутно ослободена од вишок, кристално јасна и целосно уверлива“. Ова признание е само најновото во низата национални и меѓународни награди кои брилијантната македонска актерка ги добива во последните неколку години за речиси секој нејзин проект.
Кога станува збор за наградата за најдобра претстава, жирито ја издвои „Кокошка“ поради нејзината автентична сценска енергија и доследниот уметнички и експериментален пристап, преку кој се создава современ и препознатлив театарски јазик. Со овој триумф, претставата се вброи меѓу најзабележителните остварувања на годинешното издание , во чија официјална селекција учествуваа продукции од Косово, Црна Гора, Италија, Босна и Херцеговина и Македонија.
Екипата зад успехот и идни гостувања
Режисерка на претставата е Теодора Силјаноска, која истовремено е задолжена за сценографијата и изборот на музиката. Во актерската екипа, покрај наградената Драгиќевиќ Пројковска, настапуваат и Ане Блажовски, Кристина Гиева, Toме Станковски и Ванеса Тримчевска. Костимографијата е дело на Марија Пупучевска, додека креатор на сценските движења е Дарко Велиќ.
По триумфот во Приштина, претставата го продолжува својот пат и во наредниот период ќе биде прикажана во официјалната селекција на Меѓународниот фестивал за современа драма „Kolyada – Plays“, како и на домашната манифестација „Скопско лето“.
