Пропагандниот портал Инфомакс ги навреди сите Македонци и Албанци, лажно генерализирајќи дека биле обединети во поддршка на американскиот претседател Трамп додека држел говор пред насилничкиот упад во Капитол Хил:
„Пред yпaдот говор држеше американскиот претседател, а говорот го слушаа илјадници негови поддржувачи, меѓу нив имаше и Македонци и Албанци.
Како што се гледа на сликата Македонците и Албанците се обединети преку океанот во поддршката за американскиот претседател, а македонско и албанско знаме зедно се вееја пред американскиот Конгрес.“
Наместо да го осуди насилничкиот упад во Капитол Хил, пропагандниот портал Инфомакс го злоупотреби случајот со двајца радикали пред Капитол Хил за да сервира пропагандна лага дека Македонците и Албанците во САД биле обединети во поддршка на Трамп.
Инаку, ден пред да се случи нападот, „Инфомакс“ буквално навиваше да се случи 27 април во САД, со тенденциозниот наслов дека „се крчка „27 април во САД“ и дека „Трамп утре маршира на Вашингтон“.
Да потсетиме, порталот Инфомакс беше дел од пропагандата во служба на поранешната власт на ВМРО-ДПМНЕ кои најтенденциозно известуваа на 27 април 2017.
Како што објави „Призма“ во анализата за „Улогата на медиумите во инцидентот на 27 април“, под тенденциозниот наслов „Ова е човекот кој пукаше во народот“ беа објавени слика и текст за сегашниот директор на Бирото за јавна безбедност, Сашо Тасевски кој во тоа време беше дел од полициското обезбедување на Оливер Спасовски.
„Сашо Тасевски е човекот, дел од личното обезбедување на Зоран Заев и Оливер Спасовски, кој вечерва извади пиштол со намера да пука кон народот. Ова предизвика дополнителен револт кај народот што влезе во прес-салата на Собранието, по што настана општ хаос во кој беа повредени неколку пратеници од СДСМ, меѓу кои и Зоран Заев“, известуваше тогаш Инфомакс.
Ваквото пропагандно известување на Инфомакс нема никаква врска со новинарската етика, затоа што порталот застана отворено во одбрана на насилството врз демократски избраните пратеници и врз собранието на 27 април 2017. Според Кодексот на новинарите на Македонија „Новинарот нема свесно да создава ниту преработува информации што ги загрозуваат човековите права или слободи, нема да говори со јазикот на омразата и нема да поттикнува на насилство и дискриминација по која било основа (национална, верска, расна, полова, социјална, јазична, сексуална ориентација, политичка…).“ (чл. 10)
Едно албанско и едно македонско знаме на упадот во американскиот Конгрес, за Инфомакс било доказ Албанците и Македонците се „обединиле во поддршката за Трамп“?
Веб страницата Инфомакс продолжува со секојдневните медиумски манипулации и дезинформации. Овојпат, тема е наводното „обединување“ на Македонците и Албанците на радикалниот протест и упадот во американскиот Конгрес, кој однесе 5 човечки животи.
Во текстот објавен денес со наслов „Maкeдонците и Aлбaнцитe oбeдинeти пpeку окeaнот: Maкедoнско и албaнcкo знaмe eдно до дpyго се вeeja пpeд амepикaнcкиот Koнгpec“, објавен е твит со две фотографии од протестот што заврши со упад во највисокиот законодавен дом во САД, на кои одделно се гледаат двајца учесници, едниот наметнат со знаме со сонцето од Кутлеш, а на другата фотографија учесник кој вее албанско и американско знаме.
Дајца радикали со знамиња, на одделни фотографии а не на иста, било сосем доволно за Инфомакс да заклучи дека Македонците и Албанците се обединиле преку океанот, и тоа на протестот на кој повика претседателот во заминување Трамп.
„Како што се гледа на сликата Македонците и Албанците се обединети преку океанот во поддршката за американскиот претседател, а македонско и албанско знаме зедно се вееја пред американскиот Конгрес.“, констатира Инфомакс.
Но сликата не го покажува тоа. Ако добро ги погледнете фотографиите, ќе видите дека тие ниту претставуваат доказ дека двајцата учесници излегле заедно на протест, ниту има заедничко веење на двете знамиња на крвавиот упад, ниту докази за учество на повеќе Македонци и Албанци, ниту пак дека два цели народи се „обединиле во поддршката за американскиот претседател“.
Напротив, двајца учесници на ваков крвав и злосторнички потфат, ниту може да бидат ниту се претставници на Македонците и Албанците. Дотолку повеќе што поголем дел и од граѓаните, јавноста а и политичарите кај двата народи го осудија насилството во САД, во голем дел поттикнато од долгогодишната радикална десничарска супрематистичка пропаганда.
Инфомакс е типичен пример на таква пропаганда во нашето опкружување, на наши теми. Резултатот на таа пропаганда во САД го видовме пред некој ден. Кај нас пред повеќе од 3 години, на 27 април.
Наспроти овие сили кои насекаде низ светот шират омраза, насилство, лаги, зло, далеку е поголем број на Македонци, Албанци и Американци што се обединети во една желба: Вакви злосторства над демократијата да не се повторат никогаш повеќе, ни кај нив, ни кај нас!
