Заменикот на Претседателот на Владата, задолжен за економски прашања, координација на економските ресори и инвестиции, Фатмир Битиќи, гостуваше во емисијата „Утрински брифинг“, на Слободна ТВ, кадешто зборуваше за повеќе актуелни економски теми, помеѓу кои и за петтиот пакет економски мерки за справување со последиците од кризата предизвикана од коронавирусот Ковид 19, информираат владини извори.
Тој нагласи дека мерките од Петтиот пакет имаат социјална, но се многу повеќе насочени кон развојната компонента на економијата.
„Во петтиот пакет, веројатно ќе биде последната мерка за субвенционирање на плати, но и таа е конципирана поинаку и има стимулативна компонента. Тие компании коишто ќе работат позитивно и ќе инвестираат, нема да вратат дел од средствата. Освен таа мерка, за поддршка на исплата на плати, сите други имаат развојна компонента. Како за пример, Оперативниот план за активни мерки за вработување, е во насока на заздравување од Ковид. Сите оние лица кои останале без работа, да ги вклучиме во системот како активни баратели на работа. Одреден број на лица имаат соодветни квалификации, но исто така и голем број на лица кои биле во неформална економија, на кои им требаат преквалификации и доквалификации, и планираме сериозни средства, со една нова компонента, ориентирана кон рамномерен регионален развој. Сите мерки мора да направат скок, социјалата не е единствена, но е важна и затоа пензиите редовно се исплаќаат, како и социјалната помош, но се останато мора да се насочи на развојот“, подвлече вицепремиерот.
Битиќи рече дека сите пет пакети на економски мерки се однесени во консултации со засегнатите страни, речиси на секои 3 месеци се носи нов пакет на мерки за поддршка на граѓаните и на стопанството, а доколку епидемиолошката ситуација се влоши и има потреба од дополнителни мерки, Владата е подготвена да делува со нови мерки.
Мерките се одлично концепирани и за тоа доаѓаат потврди од повеќе страни. Веќе има први реакции на меѓународните иснтитуции. Добивме потврда на кредитниот рејтинг од Стандард и Пурс, што значи дека и во период на криза сме сработиле добро, да не се направи огромна дисторзија на економијата. Трендот на индустриското производство, на преработувачката индустрија, на финалната потрошувачка на граѓаните, сите овие индикатори укажуваат, дека падот во 2020 година, би бил околу 4,4%, што e во рамките на нашите проекции. Показателите за јануари и февруари се оптимистички, во јануари трендот е во рамки на претходната година, а во февруари веќе имаме тренд на пораст, за првпат после 12 месеци, еве на приходна страна имаме двоцифрен раст, тоа е добар показател, дека расте наплата на ДДВ, царина, акциза, за данок на личен доход, тоа значи дека економијата не оди надолу“, рече Битиќи.
