Крајната придобивка што може да ја донесе Отвореното владино партнерство е да ви помогне да изградите доверба кај граѓаните и да им овозможите да се борат против негативните појави. Вие веќе имате импресивни реформи. Би Ве поттикнал да продолжите понатаму, без оглед на пречките со кои ќе се соочите, бидејќи бенефитите што граѓаните ќе ги имаат во самиот пристап при преговорите со ЕУ ќе бидат витални за вас, нагласи генералниот директор на Иницијативата Отворено владино партнерство од канцеларијата во Њујорк, Санџај Прадхан.
Тој додаде дека годинава, земјава има неверојатна можност да ги унапреди реформите преку петтиот акционен план на ОВП кој во моментов се креира заедно со граѓанското општество, каде што, како што рече, се предлагаат навистина добри идеи.
– Северна Македонија во 2021 година го креира својот петти акционен план. Со овој план имате конкретна можност да унапредите три важни цели за Северна Македонија. Првата е градење доверба кај граѓаните на уште повисоко ниво. Втората цел е градење доверба кај инвеститорите, што е од витално значење за заживување на опоравувањето на економијата од Ковид-19. Третата цел е унапредување на агендата за пристапување на земјата кон ЕУ. Постои огромен потенцијал за отворени владини реформи, за исполнување на приоритетите утврдени во оперативната програма 2020-2024, истакна Прадхан.
– Вложувајте на овој пат, којшто знаеме дека може да биде тежок, но може и да ви помогне да ја позиционирате државата како регионален и глобален лидер во Отворено владино партнерство, нагласи Прадхан.
Потсети дека Северна Македонија беше една од првите земји што се приклучија на Отвореното владино партнерство, а минатата година Општина Свети Николе се приклучи на локалната ОВП програма.
Посочи дека целта на ОВП, според зборовите на еден од основачите – поранешниот американски претседател Барак Обама, е владите вистински да им служат на граѓаните, наместо на самите себе.
Тој додаде дека кога една земја се приклучува на ОВП, Владата и граѓанското општество креираат двегодишни планови на ОВП со конкретни обврски за да ги направат владите потранспарентни и одговорни кон граѓаните.
извор: МИА
