Комплетно се реновирани хирушките сали на Клиниката за торакална и васкуларна хирургија и набавена е најсовремена опрема. Тие не беа реновирани повеќе од 60 години.
На пуштањето во употреба на реконструираниот оддел за торакална хирургија присуствуваа премиерот Зоран Заев, првиот вицепремиер и министер за политички систем и односи помеѓу заедниците Артан Груби, министерот за здравство Венко Филипче, заменик – министерот за здравство Илир Хасани, министерот за надворешни работи Бујар Османи, директорите на Фондот за здравствено осигурување и на здравствени институции.
Премиерот Заев рече дека со отворањето на реконструираниот оддел за торакална хирургија продолжуваат со низата капитални инвестиции во насока на подобрување на здравствените услуги за сите граѓани. Тој им честиташе на сите кои вредно работеле на реновирањето и во екот на пандемијата со Ковид-19.
Во реконструкцијата на одделот, како што посочи премиерот, се вложени 60 милиони денари со што комплетно се реновирани хирушките сали, купена е најсовремена опрема за комплетна грижа и лекување на пациентите, бидејќи квалитетната здравствена услуга ни е на прво место.
– Со овој чекор кој е дел од капиталните инвестиции во јавно здравствените установи Владата ја потврдува својата цврста определба за градење одржлив и ефикасен здравствен систем кој ќе им биде силна потпора на граѓаните. Во изминатите четири години Министерството за здравство интензивно работеше на подобрување на условите во јавно здравствените установи со цел поквалитетна здрвствена услуга за пациентите и подобри услови за работа на здравствените работници. Овој хирушки центар е столбот на здравствениот систем. Со заеднички сили реализиравме капитални инвестиции во реконструкции и инфраструктура во 32 здравствени установи ширум земјава, истакна Заев.
Потенцира дека со тој план биле опфатени Клиниката за трауматологија, ортопедски болести, анестезија, реанимација, интензивно лекување и Ургентен центар, клиниките за дигестивна хирургија, за хематологија, за пластична и реконструктивна хирургија, за неврохирургија, за ендокринологија, за психијатрија, за очни болести, гинекологија и акушерство, Заводот за слух, говор и глас, за детски болести, Институтот за трансфузиона медицина, Специјализираната болница за белодробни заболувања и туберкулоза во Лешок, Поликлиниката Железара, како и целиот комплекс на Интерни клиники во Клиничкиот центар.
– Реновирани се двете гинеколошки операциони сали во Специјалната болница за гинекологија и акушерство „Мајка Тереза“ во Чаир, во Здравствениот дом во Велес, Битола и Македонски Брод целосно се обновени службите за Итна медицина помош. Исто така, во поиклиниките Чаир и Ѓорче Петров комплетно се реновирани вакциналните пунктови. Годинава е во тек и втората фаза од реконструкцијата и адаптацијата на Општата болница во Кичево. Меѓу главните приоритети на буџетската политика 2021 година е поддршката на здравствениот сектор што значи заштита на здравјето и животите на граѓаните, додаде Заев.
Министерот Филипче рече дека му е драго кога на овој начин се одбележуваат вакви настани во рамки на целокупната нивна програма со заемен договор со директорите на јавно здравствените установи од чии буџети треба да се зајакне инфраструтурата во Клиничкиот центар, каде со години работат врвни експерти од одредени области.
– За време на кризата многу работи се средија, паркинг просторот, влезот се реши и проблемот со улицата „Водњанска“. Ги нема повеќе тие колони возила кои чекаат да стигнат до клиниките. Во рамките на тој целокупен план денеска се промовираат новите сали на Клиниката за торакална и васкуларна хирургија, целосно реновирани на начин на кој ниту едни операциони сали тука во блокот, каде со години наназад се изведуваат најсложените оперативни интервенции не се реновирани повеќе од 60 години. Сега благодарение на овие целосно реновирани операциони сали нашите лекари и експерти од сферата на васкуларната и торакалната хирургија ќе можат да дадат здравствени услуги на пациентите какви што се даваат во најразвиените европски болнички центри. Тоа значи дека ѕидовите, подовите, протокот на воздухот се направени по сите европски стандарди, рече Филипче.
Опремата која се наоѓа во салите, потенцира министерот, нуди можност пациентите да добијат услуги од секаков вид и повеќе од сферата на торакалната и васкуларната хирургија и нема потреба тие да се праќаат на лекување во странство. Додаде дека тоа значи сериозно зајакнување на овој осетлив дел од здравствениот систем.
– Со пуштањето во употреба на реновираните хирушки сали го подигнуваме квалитетот на здравствени услуги на највисоко можно ниво во современата медицина посебно во хирургијата за што сме посебно горди заедно со колегите и персоналот на Клиниката, рече директорот на Клиниката, Неџати Јакупи.
Тој и се заблагодари на Владата за поддршката во буџетот и посака соработката да продолжи, како и инвестициите во јавното здравство посебно во терциерното здравство.
извор: МИА
