Северна Кореја се соочува со недостиг на храна од речиси 860.000 тони оваа година, соопшти Организацијата за храна и земјоделство на ОН (ФАО), предупредувајќи дека земјата може да доживее тежок период веќе следниот месец.
Земјата, која е под неколку меѓународни санкции поради нуклеарно оружје и балистички ракети, долго време се бори да го нахрани населението, страдајќи од хроничен недостиг на храна.
Минатата година пандемијата на коронавирусот и летни бури и поплави извршија уште поголем притисок врз економијата, која е во опаѓање, а Пјонгјанг минатиот месец призна дека се бори со „сегашната криза со храна“.
Се предвидува Северна Кореја да произведе „речиси просечни нивоа“ од 5,6 милиони тони жито оваа година, се вели во извештајот на ФАО. Тоа е речиси 1,1 милиони тони помалку од потребната количина за да се нахрани целото население, а со комерцијален увоз, официјално планиран на 205.000 тони, Северна Кореја веројатно ќе се соочи со недостиг на храна од речиси 860.000 тони.
„Ако овој јаз не е соодветно покриен со комерцијален увоз и / или помош од храна, домаќинствата може да доживеат тежок период од август до октомври“, соопшти ФАО.
Пјонгјанг ги затвори своите граници во јануари минатата година за да се заштити од пандемија, како резултат на што трговската размена со Кина, нејзиниот најголем партнер, забави на минимум, додека сите меѓународни хуманитарни работници ја напуштија земјата.
Серија тајфуни минатото лето предизвикаа поплави, кои уништија илјадници домови и поплавија земјоделско земјиште.
Севернокорејскиот лидер Ким Џонг-ун неодамна изјави дека состојбата со храната е „тензична“, предупредувајќи ги луѓето да се подготват за „најлошата состојба досега“.
Во 90-те години на минатиот век, по распадот на Советскиот Сојуз, што беше негова клучна поддршка, Северна Кореја имаше недостиг на храна и стотици илјади луѓе починаа од глад.
извор: МИА
