„Централното градско јадро е основен проблем на Битола. Ќе го решиме со подземна сообраќајница, со што ќе се ослобди плоштадот кој ќе биде зелен и хортикултурно уреден“ кажа кандидатот за градоначалник на Битола од СДСМ и коалицијата, Христо Кондовски на дебатата на ТВ Телма.
Тој додаде дека основниот постулат во неговата програма е дека секој слободен денар ќе се користи за подобрување на инфраструктурата во градот.
„Заедно со подземната сообраќајница и електричниот јавен превоз, презентирани се и седум кружни текови низ Битола, со што ќе се олесни животот на битолчани“ кажа Кондовски.
Тој најави дека во моментов плоштадот се користи и како паркинг, а со неговото решение за подземна сообраќајница и подземен паркинг ќе се отворат над 200 слободни паркинг места.
Кондовски исто така најави дека ќе се изградат и велосипедски патеки со цел намалување на гужвите низ Битола и ќе се допринесе за уште позелена Битола.
„Улицата Индустриска, до царината, ќе претрпи целосна реконструкција со цел да се случи економски бум“ кажа Кондовски.
Нижеполе ќе стане скијачки центар со кој ќе привлечеме туристи од регионот
„Проектот Нижеполе ски-центар предвидува набавка на опрема со која ќе се заснежува и прави вештачки снег, за во Битола да може скијачката сезона да трае и кога нема доволно снег. Со тоа ќе ги привлечеме туристите од регионот“ кажа кандидатот за градоначалник на Битола од СДСМ и коалицијата, Христо Кондовски на дебатата на ТВ Телма.
Како што кажа тој, проектотќе се реализра во две фази, од кои во првата ќе се набави опремата за заснежување и вештачки снег, додека во втората фаза ќе се обноват трите ски лифтови.
Кондовски додаде дека освен ски-центарот Нижеполе, планира и заживување на туризмот во село Дихово, кое е на лситата од 50 скриени туристички дестаниции.
„Ќе направиме патеки во селото и ќе обезбедиме бесплатен превоз во недела за млади и пензионери. Исто така предвидуваме и решавање на деталниот урбанистчки план во подпелистерието со цел ослободување на потенцијалот во овој регион“ кажа Кондовски.
Кандидатот за градоначалник исто така најави и рехабилитација на зоолошката градина во Битола, како и основање на јавно претпријатие за туризам, кое ќе треба да изготви програма за задржување на туристите во градот на подолг период од едно деноноќие.
