Левица, претставувајќи ги навидум штетните законски измени во Законот за здравствена заштита, спинувајќи со информациите, се претставува како партија која ќе го спаси народот, така што нејзините пратеници поднеле дури 1.200 амандмани, блокирајќи го донесувањето на измените предложени од власта. Проблемот е само што измените против кои Левица проетестира се или повлечени или воопшто не се на дневен ред. Анализира Вистиномер.
Партијата Левица, коментирајќи ги измените на Законот за здравствена заштита, изнесе спин во јавноста дека со законските измени се отвора можност за приватизација на брзата помош и трансплантацијата на човечки органи.
Спин: ВЛАДАТА ВО ЗАМИНУВАЊЕ СЕ ОБИДУВА ШВЕРЦЕРСКИ ДА ЈА ПРИВАТИЗИРА БРЗАТА ПОМОШ
Министерот за здравство (во заминување) – Венко Филипче, преку навидум бенигни измени на Законот за здравствена заштита, предложени по скратена постапка, денес – во Собранието на РМ – ќе се обиде да го протурка енормно штетниот план за отворање можност за приватизација на брзата помош и трансплантацијата на човечки органи.
Ја известуваме пошироката македонска јавност дека Левица, како идеолошки профилирана партија, застанува одлучно против внесувањето на профитната бизнис логика во јавното здравство. За нас здравјето е политичко прашање од највисок приоритет и тоа не смее да биде третирано како додаток на луксузот, кое ќе биде достапно само за богатите, а недостапно за сите останати.
За таа цел, нашите двајца пратеници во Собранието на РМ денес, на Комисијата за здравство, поднесоа над 1.200 амандмани со цел да го спречат донесувањето на овој енормно штетен закон. Бараме отворање јавна расправа за ова круцијално прашање кое е во интерес на сите граѓани и итно повлекување на овој штетен закон од собраниска процедура.
[Извор: Официјална Фејсбук страница на Левица, Датум: 15.12.2021]
Контраспин: Левица, претставувајќи ги навидум штетните законски измени во Законот за здравствена заштита, спинувајќи со информациите, се претставува како партија која ќе го спаси народот така што нејзините пратеници поднеле дури 1.200 амандмани, блокирајќи го донесувањето на измените предложени од власта.
И сѐ ќе беше добро ако Левица имаше за што да интервенира и од што да ги спасува луѓето, особено во делот на можноста трансплантација да вршат и приватните здравствени установи. Имено, на 09.12.2021 година, речиси една недела пред соопштението на Левица, Министерството за здравство ги повлече предложените измени во делот на трансплантациите.
Членот 3 од овие измени предвидуваше во рамките на мрежата на здравствени установи, дејноста на итната медицинска и стоматолошка помош и домашно лекување, како и земањето и пресадувањето делови од човековото тело заради лекување, да ја вршат и приватни здравствени установи покрај јавните здравствени установи, со цел да се воспостави поефективен систем на итна медицинска помош, како и да се усогласи Законот за здравствена заштита со Законот за земање и пресадување на делови од човековото тело заради лекување.
По реакциите, Министерството за здравство се повлече од предлогот и ја информираше јавноста дека со амандман ќе интервенира за да ги повлече измените на Законот за здравствена заштита што се однесуваат на делот на трансплантација на органи заради лекување. Оттаму посочија дека се отворени за дебата, а целта е заедно со сите чинители да се надминат разликите за доброто на пациентите.
Што се однесува до брзата помош, Левица, исто така, ја манипулира јавноста дека таа ќе се приватизира што ќе биде на штета на граѓаните. Пратеничката Соња Михаиловска од СДСМ, објаснува дека брзата помош нема да се приватизира, туку само ќе се зголемат нејзините ресурси за и граѓаните од руралните средини да имаат постојана здраствена заштита.
Законската измена не ги изложува граѓаните на дополнителни трошоци, тврди пратеничката Михаиловска, туку Итната помош на приватните болници ќе се користи бесплатно.
Измените на Законот за здравствена заштита во делот со Итна медицинска помош ќе овозможат зголемување на ресурсите на Брзата Помош како и законско регулирање на услугата која со години наназад ја дават приватните здравствени установи.
Законската измена не ги изложува граѓаните на дополнителни финансиски трошоци, туку напротив амбулантните возила на итната медицинска помош на Приватните здравствени установи ќе им бидат ставени на располагање на граѓаните, односно Итната помош на приватните болници, граѓаните ќе може да ја користат бесплатно, изјави Михаиловска од СДСМ.
Дека брзата помош нема да се приватизира, потврди и министерот за здравство, Венко Филипче.
Не станува збор за приватизирање на брзата помош, тоа е политички спин. Зошто? Затоа што во законот сега јасно пишува дека итната медицинска помош може да ја врши само јавно-здравствена установа, а фактичката ситуација на терен е дека итната медицинска и стоматолошка помош ја прават и приватни установи. „Неуромедика“ има брза помош. „Жан Митрев Клиник“ има транспорт, „Никоб“ почнува сега. Ние само го озаконуваме тоа што фактички на терен се случува. Приватниот транспорт кој сега граѓанинот го повикува, го плаќа од сопствен џеб и така ќе продолжи тоа. Фондот за здравство нема да ги преземе тие обврски. Граѓаните нема да имаат никаков трошок кој досега го немале. Ние сега го ставаме во закон, она што со години наназад на терен се случува. Каде е тука приватизацијата?, изјави за „Слободен печат“ министерот Филипче.
Имајќи предвид дека Левица поднесува амандмани за измени кои се повлечени, како што е случајот со измените на Законот за здарвствена заштита во делот на трансплантациите, но и дека дезинформира за наводната приватизација на брзата помош, може да се констатира дека оваа партија спинува и ги извртува работите со цел да заработи политички поени, а на штета на граѓаните кои погрешно ги информира.
Извор: Вистиномер
