Дирекцијата за ТИРЗ не учествува директно во дискусијата за минималната плата, но компаниите во Зоните се засегнати особено што поголемиот број од нив исплаќаат минимални плати на работниците.
-Ние укажавме дека е неприфатливо да се одржуваат ниски плати бидејќи тие компании доаѓаат со поддршка од државата. Ние на новите компании што доаѓаат им велиме дека мора да обезбедат добра плата за вработените. Платата мора да расте и оваа Влада двапати ја зголеми минималната плата. Ова не е поради барање на ССМ туку е во програмата на Владата платата да расте. Но треба да имаме предвид дека имаме и домашни компании кои се соочија со кризата. Прашање е колку компаниите можат да го издржат тоа. Мора економски да растат и зајакнуваат компаниите па да растат и платите, вели Јован Деспотовски, директор на Дирекција за Технолошки индустриски развојни зони (ТИРЗ) во Утрински брифинг.
Извозот во јануари е за 7,5 отсто пораснат во однос на декември, а бројот на вработувањата е зголемен за 1,5 отсто.
Инсистираме на делот на платите затоа што компаниите инвестираат во опрема која е нивна, но нашиот интерес се вработувањата, даноците, придонесите што тие компании ги плаќаат, вели Деспотовски. Тој додава дека многу малку има соработка на големите странски инвеститори и локалните компании и дека тоа е затекната состојба.
-Освен сегментот на услугите како кетерингот, мала е соработката. Интервениравме во законот да се засили таа соработка од страна на странските инвеститори но свесни сме дека и нашите комппании не се подготвени за тоа па ќе интервенираме и во тој дел, вели Деспотовски.
Ние сакаме како држава да се прошират дејностите во ТИРЗ, оти сега се главно компании поврзани со автомобилската индустрија, а ние сфативме за време на оваа криза дека на тој начин сме изложени на голем ризик, коментира Деспотовски и додава дека сега се планира концепт за поттикнување на домашни компании кои се занимаваат со ИТ технологија да отвораат капацитетите во постојните зони, вели Деспотовски.
Деспотовски во „Утрински Брифинг“ потенцираше дека досегашното зголемување на платата е резултат од заложбата и одлуката на Влада, а не на синдикатите.
– Оваа влада во два наврати ја зголеми минималната плата. Така што платата ќе расте и тоа не е иницијатива на синдикатите туку на Владата и тоа стои во изборната програма на СДСМ од 2016 година и тоа е постигнување на влдата.И оваа влада сега останува посветана платата да расте и понатаму, рече Деспотовски.
