Зголемувањето на минималната плата треба да се гледа во рамки на пошироката економска политика која што се води во изминатите години, а тоа е дека не само што се поддржува растот на минималната плата, која што сега е дупло поголема од пред 4 години, туку оди заедно со константната поддршка на работодавците и на компаниите, истакна претседателот на Владата Димитар Ковачевски во интервју за ТВ Алсат-М.
„Јас секогаш сум бил застапник на ставот дека трудот на работниците треба да се вреднува и дека минималната плата е нешто што треба да биде над прагот на сиромаштијата. За споредба дека пред доаѓањето на оваа Владата на коалицијата предводена од СДСМ, Северна Македонија беше препознаена како рај за евтина работна сила и тука доаѓаа инвеститори на кои што им се нудеа вработени од 9.000 денари за тоа сите сме свесни. Во тоа време требаше 4 минимални плати за покривање на една потрошувачка кошничка, денес после 100% зголемување на минималната плата и со историски најмал број на невработени лица од 15,7%, потрошувачката кошница се покрива со 2 минимални плати“, нагласи премиерот Ковачевски.
Ковачевски уште додаде дека не треба да се заборави дека компаниите во државата се поддржани за околу 130.000 работни места со субвенционирање на придонесите за секое зголемување на платата на работниците.
Значајно е и тоа, рече премиерот, што за разлика од порано кога одлуките за минимална плата и за други одлуки во сферата на социјалната сфера се носеа со одлука на Влада без никаков дијалог, денес овие важни решенија се носат низ социјален дијалог со рамноправно учество на Владата, синдикатите и организацијата на работодавачите.
Растот на минималната плата, рече Ковачевски за ТВ Алсат-М, позитивно ќе влијае и на растот на просечната плата која е поттикната и од историски најголемиот раст на платите во здравството, образованието, и во другите јавни дејности.
Премиерот Димитар Ковачевски во интервју за ТВ Алсат-М истакна дека Владата ги презеде сите неопходни чекори уште на почетокот на енергетската криза за да се ублажат ценовните шокови за граѓаните и стопанството.
„Го намаливме ДДВ-то за резиденцијалните потрошувачи, односно за домаќинствата и за малите потрошувачи од 18 на 5% бидејќи го предвидовме ова што се случува. Издвоивме финансиски средства во буџетот во значителен износ со цел да можеме да извршиме субвенционирање на трошоците за електрична енергија која што граѓаните ја плаќаат, за да не се случи ценовен шок за граѓаните и тоа не се случи бидејќи има држави каде што за 50-60% е покачена цената на струјата“, рече претседателот на Владата Ковачевски во телевизиското интервју, и дополни дека од оваа перспектива со мерките што се преземаат континуирано сѐ уште се држиме до основното сценарио во однос на цената на електричната енергија.
Премиерот Ковачевски посочи дека предвидувањата укажуваат дека кон средината на оваа година ценовниот притисок ќе се намали и дека ќе следува стабилизација на цените.
