Министерката Тренчевска оствари средба со претставници на СОС Детско село на која се разговараше за активностите кои се имплементираат во сферата на социјалната реформа, грижата за децата без родители и родителска грижа, за згрижувачките семејства, за поддршката на младите над 18 години, информираат од Министерството за труд и социјална политика.
Таа посочи дека грижата за овие деца треба да биде континуирана и стручна за да можат тие да излезат од системот на социјален ризик. Тренчевска информираше дека наскоро Министерството за труд и социјална политика и УНИЦЕФ ќе започнат кампања за промовирање на моделот на згрижувачко семејство.
„ Пред нас е предизвикот за мобилизирање на што поголем број на згрижувачки семејства. Во таа насока наскоро заедно со УНИЦЕФ ќе започнеме кампања за промовирање и зајакнување на згрижувачките семејства. Очекуваме со ваквата активност да се зголеми интересот на граѓаните кои сакаат да станат згрижувачи на деца. Згрижувачките семејства на децата без родители и родителска грижа, со попреченост, децата – жртви на насилство се најдобриот начин на децата им се обезбеди грижа, љубов и посветеност“, рече Тренчевска.
Претставниците од СОС Детско село ја поздравија намерата со кампања да се подигне интересот кај граѓаните за да станат згрижувачи на деца. Посочија дека еден од начините е да се унапредат законските решенија поврзани со алтернативната грижа за деца и млади. Со проектот „Унапредување на системот на социјална заштита и поддршка на процесот за деинституционализација“, невладината организација очекува системска поддршка за помош на младите по напуштањето на СОС Детско село.
