Пациентите од источниот регион ја чекаат изградбата на новата клиничка болница во Штип. Објект што треба да даде современи услови за лекување на потенцијалните 200.000 пациенти од Свети Николе до Малешевско-пијанечкиот Регион, но и опфаќајќи ги жителите на општините Радовиш и Конче. Новиот план за изградба со ревидираниот дел од проектот за електрика и машинство говори дека првата фаза ќе заврши во 2021 година. Но, додека се чека на новиот објект, кој ќе чини 37 милиони евра, во овој регионален центар се решава проблемот со недостиг на лекари и медицински кадар. Директорот на Клиничка болница – Штип, Ален Ѓеорѓијев, вели дека ако пред три или четири години имало проблем со бројот на гинеколози, сега ова е минато. Родилките има кој да ги пораѓа, а годишно имаат од 800 до 1.000 новороденчиња, од целиот регион, пренесе МИА.
За разлика од Здравствениот дом во Делчево, каде што последниот оглас за вработување на двајца млади лекари пропадна, поради немање ваков кадар во Делчево и Македонска Каменица, а директорката чека во март двајца млади лекарки да ги завршат сите процедури околу оформувањето на своето образавание за да го распише огласот, во штипската Клиничка болница ваков проблем немаат, на досегашните огласи им се јавуваат лекари од Штип, но и од другите градови од регионот.
Ѓеорѓијев вели дека околу 40 лекари во штипската Клиничка болница во моментов се на специјализација или на супспецијализација, а во моментов недостиг од лекари специјалисти има на Ортопедија и Анестезиологија.
– На Одделението за ортопедија во моментов имаме четворица доктори, од кои еден почна со супспецијализација и во текот на оваа година двајца лекари ја напуштија болницата. Таму имаме проблем, каде што лекарите имаат зачестени дежурства, зачестена прекувремена работа и има поголем ангажман на докторите. Исто овде би го кажал и за Одделението за анестезиологија, реанимација. Тоа се два оддела каде што можам да кажам дека имаме помалку кадар и поголем ангажман на лекарите, вели Ѓеорѓијев.
Според него, сепак најголем недостиг има од болничари, хигиеничари и админстрација. Во болницата 70 лица се ангажирани и работат за минимален паричен надоместок. Проблемите овде настанале поради недонесениот акт за систематизација во 2014 година. Но, Ѓеорѓијев вели дека проблемот го решиле лани и веќе во текот на 2020 година очекува вработување на дел од овој кадар на неопределено работно време. Забележува дека со години не се вработувани стручни кадри во болницата и тоа на местата што се испразнуваат и по пат на пензионирање.
– Прашањето ви е уште колку треба да се вработат за да ја имаме онаа оптиминална бројка, па тоа е груба проценка, мислам уште 10 проценти од сегашниот кадар што го имаме. Во моментов имаме околу 515 вработени и тоа би било добра бројка за да функционираме и реков дека најголемиот проблем е во немедицинскиот кадар, вели Ѓеорѓијев.
За разлика од Клиничка болница – Штип, каде што може да се констатира дека добро стои со кадар, состојбата низ здравствените установи во Брегалничкиот Регион не е сјајна, насекаде недостигаат лекари специјалисти. Некои со години чекаат интернисти, а во помалите општини нема и педијатри. Ова е данокот од иселувањето на лекарите и медицинскиот персонал во Германија и Швајцарија. Истражувањата на невладината „Ини Виница“ покажуваат дека на истокот му недостигаат 190 лекари за да го достигне европскиот просек.
Инвестирани 200.000 евра во нови апарати
Клиничка болница – Штип располага со буџет од над 400 милиони денари. Средствата се исто колку што изнесува и основниот буџет на Општина Штип, која е најголема во регионот. Тоа значи дека првите луѓе на овие две институции менаџираат со исти средства, но ингеренциите им се различни, од кои едниот се грижи за здравствените услуги на пациенти, платите на вработените и набавка на опрема, а вториот за решавање низа инфраструктурни проблеми, реализација на нови проекти и плати на администрацијата.
Ѓеорѓијев во разговорот за МИА вели дека најголем предизвик пред две и пол години му бил во функција да ги стави сите апарати, но и да ги поднови сите одделенија со нова и современа медицинска апаратура. Досега во нова апаратура се инвестирани над 200.000 евра од буџетот на болницата.
– Набавивме апарат за анестезија, хирушки лапарскопски столб, ехо, цинтрифуга, индустриски машини за перење и за сушење алишта. Тука не застануваме, имаме многу планови. Во план е да набавиме нов лепач на крвни садови, модерен апарат за автотрансфузија кај пациентите, вели Ѓеорѓијев.
Реновирано е и Одделението за кардиологија во штипската Клиничка болница. Со помош на донации од штипскиот бизнис-сектор и средства од болницата инвестирани се околу 20.000 евра.
Комплетно се реновирани покривот, инсталацијата, тоалетите за пациентите, бањата што неколку години била надвор од функција, а болничките соби се опремени со нови кревети, прегради меѓу нив за пациентите да имаат поголема интима, како и апарати.
– Со гордост можам дека кажам дека добивме едно ново одделение, благодарение на менаџерите на Клиничка болница – Штип и штипските бизнисмени, кои активно и несебично донираа и помагаа во секој поглед во организација на овој оддел. Можам да кажам дека денес сме спремни потенцијалните 200.000 пациенти од источниот регион да ги прифатиме, да ги третираме и да ги лекуваме на ниво на Клиника за кардиологија, вели Сашко Николов, кардиолог.
На оваа одделение месечно се стентираат меѓу 40 и 50 пациенти, а од 100 до 120 се коронографии. Смета дека новото реновирано одделение е рамно на она што го работат колегите во Скопје, Охрид и Тетово.
Пред еден месец и лекарите од Очното одделение добија нов ехо-апарат, кој дава прецизна дијагноза, а во истиот период почна да функционира и компјутерскиот томограф, кој речиси еден месец не работел, а како што вели Ѓеорѓијев, се работеше за исклучително скапа поправка. Заменета е цевката, што чини околу 140.000 евра. Ова се дел од новините во штипската болница, а најголемиот инвестициски зафат ќе биде годинава, и тоа напролет, во реконструкцијата на Инфективното одделение. Тендерската постапка е завршена, а првата фаза од реконструкцијата на овој објект, кој е единствен во источниот регион, ќе го реализира македонскиот конзорциум од четири фирми „Клима“. Реконструкцијата предвидува нова фасада, прозорци и изградба на рампа за лица со попреченост.
– Во моментов градежните фирми мируваат, поради студеното време, а исто така имајќи предвид дека во ова одделение се примаат и пациентите од целиот источен регион очекуваме и до средината на март да стивне и грипот. Во текот на пролеттните месеци очекуваме да почнат градежните зафати, вели Ѓеорѓијев.
Средствата за реконструкција се обезбедени преку Програмата за меѓугранична соработка со Бугарија, а партнери во проектот „Климатски пријателски здравствени институции“ се болницата во Штип и бугарската општина Гоце Делчев. Рокот за реализација е две години, преку ИПА-фондовите за штипската болница обезбедуваат 170.000 евра, а дополнително треба да се обезбедат средства за кофинасирање. Проектот за македонска страна треба да чини 203.000 евра. Инфективното одделение и по изградбата на новата клиничка болница ќе остане да функционира надвор од неа./MИА
