Војната во Украина силно се одрази врз економијата и сериозно го наруши стопанството. Со енергетската криза, која моментно е најголемиот ризик за бизнисот, ниту една земја не може да се справи сама. Државите мора да се дејствуваат здружено и заеднички за да ги совладаат актуелните предизвици, порачаа учесниците на денешниот Македонско-германски форум „Европската економија под стрес по руската инвазија во Украина“.
Како што беше речено, корона-пандемијата беше првиот удар, вториот удар е војната во Украина која сериозно го наруши европскиот синџир на снабдување, а санкциите кон Русија и енормните цени на гас и нафта се последниот удар со кои се бори индустријата.
Според учесниците, руско-украинскиот конфликт ќе поттикне огромни промени од економски аспект.
-Русија не користи само воено оружје, туку и економско – оружје на енергијата. Ниту една држава сама не може да се избори со зависноста од енергија, тоа сите земји треба заедно да го направат. Знаеме какви проблеми ни претстојат. Се поставува прашањето за снабдување со енергија и тука, во земјава, и тоа ќе биде важно прашање во следните месеци, како и во другите земји. Затоа, не смееме да се разделиме, рече директорот на фондацијата Конрад Аденауер, Даниел Браун.
Руската агресија врз Украина, додаде Браун, не претставува само напад на меѓународниот поредок, туку ги соочува Европа и светот со сосема нови предизвици.
-Покрај снабдувањето со енергија, важни за идните инвестиции се и новите локации на производство, како и синџирот на добавувачи, потенцира Браун.
Амбасадорката на СР Германија во Северна Македонија, Анке Холштајн се осврна на перспективата на Северна Македонија.
-Не е случајно што Западен Балкан, вклучително и Република Северна Македонија добива поголемо внимание од германската Сојузна влада од кога било досега. Наш приоритет е да ги внесеме земјите од Западен Балкан во ЕУ, да ги заштитиме мирот, стабилноста и економскиот напредок за нас и за следните генерации. Ова е исто така причината зошто германската Влада го ревитализираше Берлинскиот процес, рече Холштајн.
Таа изрази почит и благодарност за, како што нагласи, принципиелната позиција на Северна Македонија во однос на целосно усогласување со позициите на ЕУ: санкциите, пречекот на бегалци, помошта и доставувањето оружје.
Амбасадорката повтори и дека Германија останува силен поддржувач на македонскиот евроинтеграциски процес.
-Знаете дека секогаш можете да сметате на нашата поддршка, подвлече Холштајн.
Директорот на Делегацијата на германското стопанство Патрик Мартенс се осврна на синџирите на снабдување кои најпрво беа предизвикани, како што потсети, од КОВИД-от, но и со затворањето на пристаништата во Кина.
-Тоа покажува колку се ранливи нашите домашни индустрии. Сепак, со војната во Украина кризата го достигна врвот – повторно нарушување во синџирите на снабдување и вртоглаво зголемените цени на енергијата. Затоа, Југоисточна Европа, особено Западен Балкан, се во фокусот на новите синџири на снабдување за диверзификација на ризикот. Трговскиот биланс во моментов со овој регион веќе покажува импресивни резултати и тој ќе продолжи да расте. Порано се бараа компании на кои фирмите од Западна Европа им продаваа услуги и производи, денес тие на Западен Балкан бараат компании од кои ќе купат готови или полупроизводи, посочи Мартенс
Домаќини на македонско-германскиот форум беа Фондацијата Конрад Аденауер, Делегацијата на германското стопанство и Институтот за демократија.
