Арапските и исламските земји повикаа денеска да се гласа за нацрт-резолуцијата на Советот за безбедност на Обединетите нации со која се бара прекин на огнот во Појасот Газа со цел да се достави хуманитарна помош.
Предложената резолуција е одговор на писмото испратено од генералниот секретар на ОН, Антонио Гутереш до Советот за безбедност во средата, во кое предупредува на претстојната „хуманитарна катастрофа“ во Газа и ги повикува 15-те членки на телото да гласаат за прекин на огнот заради испорака на хуманитарна помош и ослободување на заложниците.
Нацрт-резолуцијата е поднесена од Обединетите Арапски Емирати (ОАЕ), кои се арапски претставник во СБ на ОН.
Гутереш денеска треба да го информира Советот за безбедност за писмото испратено до 15-членото тело според ретко користениот член 99 од Повелбата на ОН, на кој ниту еден генерален секретар на ОН не се повикал од 1989 година.
Палестинскиот амбасадор во ОН Ријад Мансур вчера изјави пред новинарите дека сите се надеваат дека СБ ќе ја усвои резолуцијата предложена од ОАЕ.
САД, најблискиот сојузник на Израел, не го поддржа прекинот на огнот и има право на вето во ОН. Мансур рече дека претставници од арапските и исламските земји денеска ќе се сретнат со американски официјални претставници за да побараат поддршка од САД за резолуцијата.
Гутереш го предупреди Советот за безбедност на ОН дека војната меѓу Израел и палестинските милитанти Хамас во Појасот Газа „може да ги влоши постоечките закани за меѓународниот мир и безбедност“.
Гутереш се повика на ретко користениот член 99 од основачката Повелба на ОН, кој му дозволува „да го сврти вниманието на Советот за безбедност кон секое прашање што според него може да го загрози одржувањето на меѓународниот мир и безбедност“.
„Се соочуваме со сериозен ризик од колапс на хуманитарниот систем. Ситуацијата брзо се влошува во катастрофа со потенцијално неповратни импликации за Палестинците како целина и за мирот и безбедноста во регионот“, напиша Гутереш.
Тој нагласи дека таков исход мора да се избегне по секоја цена.
