Финалето на Лигата на шампионите во 2026 година ќе се игра на стадионот „Пушкаш Арена“ во Будимпешта, одлучено е на состанокот на Извршниот комитет на Европската фудбалска централа (УЕФА) во Даблин.
Будимпешта беше единствениот кандидат за организација на финалето на најсилното европско фудбалско натпреварување во 2026 година, па немаше голема дилема околу тоа кој би можел да ја добие оваа престижна можност од европската куќа на фудбалот.
УЕФА соопшти дека ја одложила одлуката за домаќин на финалето на Лигата на шампионите во 2027 година, иако единствен кандидат за организација на ова финале беше стадионот „Џузепе Меака“ во Милано.
Како што беше претходно познато, одлучено е финалето на Лигата на шампионите на УЕФА за 2025 година да се игра на „Алијанц Арената“ во Минхен.
Што се однесува до овогодинешното издание на финалето на најсилното натпреварување на Стариот континент, меѓу Реал и Борусија Дортмунд, тоа е закажано за 1 јуни на лондонски „Вембли“.
УЕФА во соопштението наведе дека финалето на Лига Европа во 2026 година ќе се игра на стадионот Бешикташ во Истанбул. Организацијата на финалето на Лига Европа во 2027 година му беше доделена на Франкфурт. Финалето на Конференциската лига во 2026 година ќе се игра во Лајпциг, а во 2027 година на стадионот Бешикташ.
