Франција планира да ги продолжи проверките на своите граници за да ја спречи илегалната миграција „колку што е потребно“, изјави премиерот Мишел Барние.
Претставувајќи ја програмата на неговата нова администрација во Националното собрание, Долниот дом на земјата, Барние рече дека граничните контроли што треба да истечат месецов ќе бидат продолжени, истакнувајќи слични мерки воведени во Германија минатиот месец.
И покрај правилата на Шенген зоната кои гарантираат слобода на движење, Франција првпат ги воведе проверките на своите граници во 2015 година по нападите на исламистите, дозволувајќи и да ги врати мигрантите без право да влезат во земјата.
Шестмесечните мерки, наменети за заштита од тероризам, оттогаш беа постојано продолжувани, а неодамна и во врска со Олимписките игри.
Барние вети и засилување за Европската агенција за гранична и крајбрежна стража, позната и како Фронтекс, со цел подобро следење на надворешните граници на ЕУ.
Франција минатата недела ја потресе смртта на париски студент кој наводно бил убиен од мигрант ослободен од притвор пред депортација.
Како одговор, Барние, исто така, најави продолжување на притворот пред депортација од максимум 90 дена на 135 дена, со цел да се олесни депортацијата и да се намали бројот на мигранти кои илегално престојуваат во земјата.
