Две недели по преземањето на власта, новиот сириски водач Ахмед ал Шара изјави дека оружјето во земјата, вклучително и она што го држат силите предводени од Курдите, ќе биде ставено под државна контрола.
Шара зборуваше заедно со турскиот министер за надворешни работи Хакан Фидан, по претходна средба со водачите на либанските Друзи и вети дека ќе стави крај на „негативното мешање“ во соседната земја.
Бунтовниците поддржани од Анкара одиграа клучна улога во поддршката на исламистичката група на Шара, Хајат Тахрир ал-Шам (ХТС), која беше на чело на бунтовничката алијанса што го зазеде Дамаск на 8 декември, соборувајќи го долгогодишниот владетел Башар ал Асад.
За време на прес-конференцијата со Фидан, Шара рече дека сириските вооружени „фракции ќе почнат да објавуваат распуштање и да влезат“ во армијата.
„Апсолутно нема да дозволиме да има оружје во земјата надвор од државната контрола, било од револуционерните фракции или од фракциите присутни во областа на СДФ“, додаде тој, мислејќи на Сириските демократски сили предводени од Курдите.
Шара ја замени маслинесто-зелената воена кошула што ја носеше пред само неколку дена за костум и вратоврска за време на неговите состаноци во неделата во претседателската палата.
Тој понатаму порача дека малцинствата и сектите ќе бидат заштитени од државата.
„Работиме на заштита на сектите и малцинствата од какви било напади што ќе се случат меѓу нив“ и од „надворешни“ актери кои ја искористуваат ситуацијата „за да предизвикаат секташки раздор“.
Во речиси 14-годишната граѓанска војна во Сирија убиени се повеќе од половина милион луѓе и раселени повеќе од половина од нејзиното население, при што многу од нив побегнаа во соседните земји, вклучително и 3 милиони во Турција.
Д. Т./Цивил Медиа
