На вечерашната седница на Владата донесена е одлука за промена на сатницата на полицискиот час за повеќе и различни категории на граѓани, информира премиерот Спасовски во ТВ 24.
Лицата кои се постари од 67 години ќе можат да се движат од 5 часот наутро до 11 часот претпладне. Значи возрасни лица постари од 67 години не смеат да се движат во период од 11 часот претпладне па се до 5 часот наутро наредниот ден. Оваа мерка како што вели премиерот Спасоски е за да се заштитат повозрасните лица кои се најизложени и најранливи на корона вирусот.
Втората група која е опфатена со посебна сатница на полициски час се младите до 18 години. Тие нема да можат да се движат од 21.00 до 12 часот попладне.
За сите останати Полицискиот час ќе биде од 21 часот па до 5 часот наутро. Промената од 21 до 5 часот, наместо како што беше до сега до 6 часот, е донесена заради организација на превозот и стигнување на работа на одредени категории граѓани, рече премиерот Спасовски на ТВ 24 во Отвореното студио.
Утре на седница на Кризниот штаб ќе биде разгледана и можноста за целосно укинување на јавниот превоз.
Спасовски не исклучува и дополнителни рестриктивни мерки зависно од тоа какви ќе бидат проценките за развојот на настаните и колку граѓаните ќе бидат дисциплинирани во применувањето на досега донесените.
Ј. Ѓ.
