Пратеничката на СДСМ, Сања Лукаревска на денешната собраниска седница посветена на пратенички прашања, упати две прашање до министерот за култура, Зоран Љутков, кои се однесуваа на македонскиот јазик: Кога ќе почнат да ги исполнуваат обврските од Законот за македонски јазик, бидејќи не е исполнета ниту една обврска и дали не се срамат затоа што досега ништо немаат направено за македонскиот јазик?
Лукаревска, нагласи дека македонскиот јазик е основа на националниот и културен идентитет на Македонија и дека заштитата и афирмирањето на јазикот останува обврска на сите. Според неа, политиките на Владата на СДСМ покажале како треба да се постапува за зачувување и унапредување на македонскиот јазик, а истовремено ја критикуваше актуелната власт за неактивноста во оваа област.
„Горда сум што сум дел од партија и влада која покажа вистинска посветеност за македонскиот јазик. За време на владеењето на СДСМ, се реализираа важни државнички политики кои го заштитуваат и афирмираат нашиот јазик,“ рече Лукаревска. Таа посочи дека токму Владата на СДСМ го прогласи 5 мај за Ден на македонскиот јазик, како и дека благодарение на тоа македонскиот јазик е признат во Обединетите нации и стана дел од јазиците на Европската унија.
Лукаревска ја истакна и инвестицијата во Институтот за македонски јазик и дигитализацијата на 5 милиони текстови, како и новите вработувања на научници по 24 години. Таа ја спомена и важноста на Законот за употреба на македонскиот јазик, кој вклучува задолжително лекторирање на официјални материјали и нови работни места за лектори во јавните институции.
„Сето ова, за жал, не се спроведува под Владата на ВМРО-ДПМНЕ. Девет месеци по донесувањето на Законот, нема ни иницијатива за формирање на Инспекторат за употреба на македонскиот јазик и нема вработувања на лектори,“ додаде Лукаревска. Таа истакна дека ВМРО-ДПМНЕ не презела ниту една мерка од Законот, што според неа е недозволиво за една влада која тврди дека ја почитува културната и јазичната вредност на Македонија.
Лукаревска ја потсети ВМРО-ДПМНЕ и на ставот на нивните претставници за Блаже Конески, когo го нарекоа „Џуџето од Небрегово“, оценувајќи дека вакви ставови го откриваат нивниот вистински однос кон македонскиот јазик и култура.
На крајот, Лукаревска постави две прашања до министерот за култура, Љутков:
-Кога ќе почнете да ги исполнувате обврските од Законот за македонски јазик?
-Дали не се срамите за тоа што досега ништо немате направено за македонскиот јазик?
