Македонскиот кантавтор во подем, Јон Ajди, официјално потпиша со американската издавачка куќа Nvak Collective, во пресвртна точка на неговиот сè подинамичен музички пат и меѓународен пробив, известуваат од 2by4 Production.
Познат по својот емоционално интензивен инди-поп звук со гранџ рок ноти и текстови со длабочина, Јон постепено ја гради својата европска публика преку настапи во Амстердам, Берлин, Косово, Шведска и Бугарија. Сингловите објавени во 2024 година – Blood Red, Going Down, Walk Away и Reflections – најавија позрела и подинамична музичка насока, која кулминираше со издавањето на неговиот дебитантски албум Ghosts во август 2024 година, кој доби пофалби од критиката.
Издавачката куќа Nvak Collective, основана од артистката и социјална претприемачка Тамар Капрелијан, е женски основана и водена компанија од новата генерација. Работи како издавачка куќа, менаџмент, издаваштво и дистрибуција, и е целосно посветена на поддршка на разновидни гласови и изградба на поправедна и поинклузивна музичка индустрија. Со повеќе од 3 милијарди стримови преку својот каталог, вклучувајќи го глобалниот хит “SNAP” од Rosa Linn, Nvak е препознаена во медиумите како Billboard, Variety, Forbes и The Wall Street Journal, и важи за лидер во развојот на млади музички таленти.
Во досегашната кариера, Јон настапувал на значајни европски фестивали, меѓу кои се Sunny Hill Festival во организација на Дуа Липа, Live at Heart Showcase Festival во Шведска и So Alive Music Showcase во Бугарија. Во 2022 година беше еден од шесте национални финалисти за изборот на претставник на Евровизија, а претходно беше и музички водител на национално телевизиско ток-шоу. Со неодамна потпишаниот договор за синхронизација со њујоршката музичка продукциска куќа The Music Playground, Јон го зацврсти своето присуство и на американскиот пазар.
Во моментов работи на својот следен албум, инспириран од артисти како Noah Kahan, Hozier, flora cash и Leonard Cohen, со што креира искрен звук кој обединува модерна инди-поп енергија и кантри сензибилитет, посочуваат од 2by4 Production.
