Популацијата на медоносни пчели во Белгија се намалила за 22,5 проценти во текот на изминатата зима, покажуваат резултатите од национално истражување спроведено од Универзитетот во Гент во соработка со неколку истражувачки институции.
Во анкетата биле вклучени 710 пчелари, кои пријавиле загуба на 1.679 пчелни колонии. Стапка на зимска смртност од 10 отсто се смета за нормална, но оваа година бројките се значително повисоки. Слични загуби се регистрирани и во 2024 година (22,3%), додека во 2023 биле околу 17 проценти, соопшти професорката Елен Данелс.
Главни причини за високиот морталитет се паразитската болест вароатоза и појавата на инвазивни азиски стршлени кои се хранат со пчели. Околу половина од пчеларите се обиделе да се справат со паразитот користејќи оксална киселина, додека 10 отсто пријавиле празни кошници по напади од стршлени.
Најголеми загуби се забележани во Брисел (44%), додека најмала смртност е регистрирана во Фламански Брабант (7,9%).
Белгиската криза е дел од глобален тренд. Според новиот извештај на иницијативата „Bee:wild“, пчелите и останатите опрашувачи се соочуваат со нови ризици: војни, микропластика, светлосно и воздушно загадување, пестициди и климатски промени. Истражувањето наведува дека речиси 90 отсто од дивите растенија и 75 проценти од светските култури зависат од опрашувачи.
