Иран и земјите од групата Е3 – Германија, Франција и Велика Британија денеска во Истанбул треба да ги продолжат нуклеарните разговори, соопштија ирански функционери.
Средбата, закажана за утрово во иранскиот конзулат, треба да се одржи на ниво на заменици министри за надворешни работи.
Ова ги означува првите преговори по прекинот на огнот по неодамнешната војна на Израел со Иран. Европските дипломати имаат за цел да го зголемат притисокот врз Техеран да се вклучи во сериозни нуклеарни разговори.
– Времето истекува, рече еден дипломат, предупредувајќи дека без напредок, групата Е3 може да го активира механизмот „snapback“ за повторно воведување санкции на ОН против Иран, пренесе ДПА.
Виенскиот договор од 2015 година, иако во голема мера неактивен, формално истекува во средината на октомври.
Клучните европски барања вклучуваат обновен пристап за нуклеарните инспектори на ОН и јасност за судбината на 400 килограми високо збогатен ураниум, за кој нема трага по американскиот напад врз иранските нуклеарни постројки.
Иран неодамна одржа два месеци индиректни разговори со САД и инсистира дека неговата нуклеарна програма е за мирни цели. Техеран бара олеснување од меѓународните санкции кои тешко ја погодија неговата економија.
