Премиерот Оливер Спасовски на денешната прес-конференција истакна дека во светот има +1.2 милиони заразени, а досега има повеќе од 70.000 починати од Ковид 19. Следејќи ги искуствата од другите земји, истакна Спасовски, најавивме дека ќе преземаме и соодветни мерки.
Тој истакна дека фазата во која влегуваме е нова – радикална фаза и за здравствените работници и за економијата и за граѓаните. Премиерот порача дека само заедно можеме да ја намалиме силата на епидемијата и дека ние како земја го немаме поминато најлошото. Во следните 2-3 недели ќе го достигнеме пикот кој ќе биде околу 2000 или 2500 заразени. Заканата е страшна затоа и нашето делување мора да биде радикално, потенцира Спасовски.
Премиерот ги соопшти новите мерки за забрана на движење на граѓаните:
„Се забранува движењето за сите граѓани на ниво на целата територија, секој работен ден, од понеделник до петок, од 16:00 часот до 05:00 часот наредниот ден
За лицата над 67 годишна возраст се забранува движењето во текот на сите работни денови, од понеделник до петок, освен во периодот од 10:00 до 12:00 часот.
За младите лица до 18 години се забранува движењето во текот на сите работни денови, од понеделник до петок, освен во периодот од 13:00 до 15:00 часот.
За време на викендот се забранува движењето за сите граѓани од петок во 16:00 часот до 05:00 часот во понеделник.
Според одлуката, се забранува движењето на граѓаните на јавни места и јавни површини во групи поголеми од две лица, при што тука не се вбројуваат лицата помали од 14 години, доколку се деца на родител кој е дел од групата од двајца.
Новите ограничувања стапуваат во сила во среда, 8 април 2020 година во 16 часот.“ соопшти Спасовски.
Целта е заштита на јавното здравје и здравјето на секој поединец потенцира Спасовски и порача Велигденските и Рамазанските празници ќе мораме да ги поминеме дома. Тој порача строго придржување на полицискиот час и истакна дека секое отстапување ќе биде казнето.
Премиерот Спасовки нагласи дека никој од нас нема право да разгрози туѓ живот, а тоа ќе го направиме само ако останеме дома. Ова битка може да ја добиеме само сите заедно. Секој од нас мора да биде одговорен и да ги почитува препораките, истакна Спасовски.
Спасовски рече дека државата има капацитети и дека активни се повеќе од 1000 болнички кревети, ако има потреба од тоа. Тој потенцира да не се созадаваат лажни вести и паника и подвлече дека институциите ваквите злоупотреби ќе ги санкционираат.
J. Ѓ.
