Реномираниот италијански новинар и вински експерт Марко Поцали го претстави новото авторско вино „Пред дождот“ (Prima della pioggia), инспирирано од култниот филм на македонскиот режисер Милчо Манчевски.
Станува збор за ограничено производство на вино од 100% сорта аглијанико, создадено на падините на Везув, во регионот околу Неапол, на вулканска почва и од органски одгледувани лозја.
Виното е создадено како посвета на филмот „Пред дождот“, добитник на Златен лав и уште девет награди на Филмскиот фестивал во Венеција во 1994 година, кој во Италија беше прогласен за филм на годината и претставува прва македонска номинација за Оскар во 1995 година.
„Филмот ‘Пред дождот’ ме следи од 1994 година, кога силно ме погоди. Убавината на филмот, кружната порака што ја носи, идејата дека времето никогаш не чека и никогаш не умира, станаа дел од мојот личен и професионален свет“, изјави Поцали.
Тој додаде дека проектот не е замислен како комерцијален бренд, туку како авторска соработка што ги поврзува виното, времето и местото. Новото вино е резултат на директна соработка меѓу Поцали и Милчо Манчевски и е дел од концептот „Јажето на 41-та паралела“, симболична линија што поврзува различни култури и простори, вклучително и Скопје и јужна Италија.
„Сакав линија што обединува, а не разделува и виното е дел од тоа патување. Како патување, таа линија тргнува од јапонскиот остров Хоншу, минува низ Азија и Медитеранот, со симболична станица во Скопје – родниот град на Манчевски, за да заврши во Неапол, под Везув“, рече Поцали.
Во проектот учествува и Манчевски преку визуелниот идентитет на виното. За првата берба е избрана неговата фотографија „Гинко“ (2011), за која режисерот вели: „Ливче фатено во вода, водата фатена во метален квадрат, квадратот фатен во наполу обоен бетон. Суштината на природата опстојува, како во чаша вино“.
Ова е петто вино во серијата „Пред дождот“, по претходните изданија создадени на Етна, во словенечкиот Карст, Тоскана и Франчакорта. Најновото вино моментално одлежува во шише и ќе биде претставено во специјална пригода.
„Ова е вино создадено за споделување, не за масовен пазар“, нагласи Поцали, додавајќи дека проектот ќе продолжи со идни ограничени берби со јасен авторски печат и силна врска меѓу виното, времето и местото.
