Вицепремиерот Александар Николоски остварил работни средби во Стејт департмент на САД во рамки на работната посета на Вашингтон, на кои се разговарало за стратешкото партнерство меѓу Македонија и САД, соопшти Министерството за транспорт.
На средбата со Даниел Лоутон, заменик помошник државен секретар задолжен за Европа, било истакнато силното партнерство меѓу двете земји засновано на меѓусебна поддршка, демократски вредности и заедничка посветеност за економска и трговска соработка.
Во изјава по средбите во Стејт департментот, Николоски посочи дека САД се клучен партнер за Македонија.
„Денеска во американскиот Стејт департмент остварив неколку средби на високо ниво на кои разговаравме за односите меѓу нашите две држави. САД се стратешки партнер број еден на Македонија, држава која што најмногу ја поддржува Македонија и разговаравме за заедничката економска и политичка соработка“, изјави Николоски.
Фокус на економската соработка и коридорите 8 и 10
Според Николоски, на средбите се разговарало и за продлабочување на економската соработка, особено во областа на енергетската транзиција и инфраструктурата.
„Зборувавме за економската соработка пред сè во делот на енергетската транзиција и изградба на коридорите. Зборувавме за паневропските коридори 8 и 10 кои што поминуваат низ Македонија и кои што се витално значајни за економијата и безбедноста на нашата држава“, изјави тој.
Тој додаде дека се разговарало и за соработката во рамки на НАТО и за заедничките операции во актуелниот безбедносен контекст.
„Очекуваме повторно да се активира Стратешкиот дијалог каде ќе разговараме за заедничките предизвици што ги имаат двете држави“, рече Николоски.
Очекувања за трговски договор меѓу двете држави
Николоски најави и можност за напредок во трговската соработка меѓу Македонија и САД.
„Тука е и трговскиот договор кој што треба да овозможи многу повеќе бизнис, многу повеќе трговија помеѓу двете држави и секако стратешкото партнерство кое што треба да значи просперитет, напредок, безбедност и прозападни вредности на Македонија“, изјави Николоски.
Во рамки на посетата на Вашингтон, вицепремиерот денеска ќе се обрати и на глобалниот настан Transforming Transportation 2026, посветен на иднината на транспортните политики и инфраструктурата.
