Портпаролката и членка на Извршниот одбор на СДСМ, Богданка Кузеска, одржа прес-конференција пред просториите на Државната комисија за спречување на корупцијата (ДКСК), од каде упати јавен повик до ова тело итно да го истражи најновиот скандал во кој, според неа, е вмешан највисокиот врв на Владата. По повикување на документи неодамна објавени во медиумите, опозицијата тврди дека генералниот секретар на Владата, Игор Јанушев, е директно поврзан со компанија регистрирана во Република Бугарија. Кузеска алармираше дека ваквиот бугарски капитал или сопственичка поврзаност воопшто не се наведени во неговите официјални анкетни листови доставени до Антикорупциската комисија.
СДСМ побара ДКСК да не биде нем набљудувач на случувањата, туку веднаш да ги провери сите факти, да ја побара целосната документација и без никакво одлагање да ја информира јавноста за исходот. Од партијата потенцираат дека законот предвидува строги казни доколку се докаже дека владин функционер свесно криел сопствен удел во странска фирма, нагласувајќи дека институциите се должни да дадат одговори бидејќи самиот Јанушев веќе втор ден по ред го нема во јавноста за да го објасни случајот.
СДСМ обвинува за бизнис интереси и политичко лицемерие на власта
Според партискиот став на опозицијата, овој случај во целост го разоткрива лажниот наратив и политичкото лицемерие на премиерот Христијан Мицкоски и владејачката ВМРО-ДПМНЕ.
„Овој скандал го открива целото лицемерие. Тераат бизнис интереси во Бугарија, не чекаат како граѓаните со часови на граници, а во исто време ја блокираат европската интеграција на Македонија и ги блокираат парите од ЕУ преку фондовите. Дали сега Јанушев, како генерален секретар на Владата, ќе поднесе оставка додека трае истрагата за неговата компанија во Бугарија?“, изјави портпаролката Богданка Кузеска.
На крајот од своето обраќање пред Антикорупциска, таа додаде дека одговорност за транспарентноста мора да има, особено кога станува збор за позиција со висок државен профил како што е генералниот секретар на Владата, поради што СДСМ будно ќе го следи развојот на настаните и постапувањето на надлежните институции.
