Музичката програма на Фестивалот „Охридско лето“ продолжува вечерва со концертот на „Фукио“ саксофон квартетот од Шпанија, во состав Хоакин Саез Белмонте на сопран саксофон, Хавиер Ларсон Паез – алт, Хозе Мануел Бањулс Маркос – тенор и Kсабиер Касал Арес – баритон саксофон.
„Фукио“ се еден од највозбудливите млади саксофон квартети во Европа. Од нивното основање во 2007 година квартетот е интензивно посветен на истражувањето на камерната музика за саксофон.
Тие настапуваат на сцените во Германија, В. Британија и Шпанија, во Фондацијата „Хуан Марч“ и Националниот аудиториум во Мадрид, но и на бројни фестивали како Австриската академија „Импулс“, фестивалот за современа музика во Хадерсфилд, Фестивалот за саксофон во Мајорка, како и на фестивали во Келн, Дизелдорф, Франкфурт и на Фестивалот „Young Euro Classis“ во Берлин.
Добитници се на бројни награди и признанија од меѓународни натпревари како натпреварот на Музичката младина на Шпанија, натпреварот „Класична порта“ во Барселона, и меѓународниот натпревар Јамаха во Мадрид. Го освојуваат и златниот медал на натпреварот во Луксембург, прва награда на Високата школа за музика „Менделсон“, како награди во Милано и на натпреварот за нова музика во Карлсруе. Активно се посветени на порачки на нова музика за нивната формација, а еден од главните интереси на „Фукио“ е образовната работа и работата со млади, па често одржуваат мајсторски курсеви и работилници на Универзитетот во Источна Англија и на музичката академија на Балеарските острови. Нивни ментори се квартетот „Касалс“, а поддржани се од фондацијата „Вернер Рихард- Карл Доркен“.
На концерот закажан за од 21 часот во Предворјето на „Света Софија“ се дела на Дворжак, Албениц, Пјацола, Ниман, Понсе и Лаго./МИА/
