пишува: ЈАНЕ ЃОРЃИОСКИ
„На новинарскиот збор, одговорете со збор…“, им беше мотото на денешниот протест. Прво сакав да прашам – На кој новинарски збор? Овде медиум има, еве да речеме дека има и збор, но новинар не постои?! Но, ајде да не се тепаме со дебатата „кој е новинар“, зашто има овде нешто многу посуптилно на што мора да се обрне внимание.
Гледав снимка од протестот. Гледав кој денес е присустен на протестот на кој повика Новинарското здружение МАН, за отфрлање на обвинението кон извесен Александар Митовски од порталот Инфомакс. Гледав и за соопштението на ЗНМ во кое се бара да се отфрли обвинението што е поднесено против истиот човек. Денес исто и Агенцијата за аудио и аудиовизуелни услуги со слична реакција.
Но, еве и што уште новинарот Борјан Јовановски забележал на денешниот протест:
Борјан Јовановски: – „Дали некој знае кој е “новинарот”? Мене ми личи на “патриотот” кој дојде да ме плука во ресторанот “Воденица” во одбрана на “националните интереси”
Случајност ли е, од буквално двајца, кои стојат позади Ивона и Александар, едниот да е плукачот на Боко?
Кој кого овде поддржува? Која е пораката што МАН ни ја испраќа со присуството на плукачот, веднаш позади нив?
Пораката е јасна. На толку очигледен начин, тие ни кажуваат да внимаваме што правиме и да не забораваме што следи ако не сме со нив и позади нив. Но, „се плашам“ дека не е стравот тој, што некои за 180 степени отпревртени „новинарски шии“, си зедоа за право да повикуваат други колеги да присуствуваат на протестот.
Се чудам, не можам да поверувам:
– Со кое лице, тие новинарски ликови со поминат рок на траење, кои плукаат безмалку на сè за што наводно се бореле, а сега затскривајќи се позади наводна принципиелност и колегијалност, го повикуваа Кежаровски да излезе, присуствува и даде поддршка на режираниот режимско-медиумски протест?
Не знам дали Кежо присуствувал, тоа е негово право, но, нели е крајно бедно и лицемерно да се поистоветува и релативизира прогонот на Кежаровски, со овој очигледен криминален случај што има за цел – не да пласира информација од јавен интерес, туку да компромитира документ, а со тоа и цела истрага, која е од исклучителен и важен интерес за јавноста.
Од друга страна, кога пак, толку „искрено“ си зел задача да повикува колеги новинари, можеше да го повика и Борјан, па да се искористи приликата и да им организира едно селфи на Борјан со плукачот, се разбира во духот на простувањето.
Зошто тој новинарски лик, кој сега со сите сили се умилкува кај режимските медиуми и упорно се прави недоветен, а всушност користи секаква прилика да се активира онаа позната режимска партиско-медиумска спрега што на секој начин сега сака да се прикаже како жртва, навистина не ми е познато, но внимавајте, тоа го прави извонредно транспарентно.
Она што најповеќе иритира е што оваа „вртимушка“, се обидува да се расфрла и кити со „саможртвите“ што ги дал за вистината и правдата, прогонуван од минатиот режим, па ти се чини тој сам го турнал режимот, а ние сите други: активисти, новинари, политичари, шарени, црвени, секакви… сме биле само неми и резервни следачи на неговото слободарско его.
Инаку, сакав да обрнам внимание на тоа зошто ЗНМ се „испотепа“ да излезе со реакција за човек кој ни името свое не е доблесен да го потпише позади пишан текст. На неговиот портал нема ни Импресум, а не е јасно ни со кој минат труд и потпишани текстови дотичниот покажал дека е новинар. Еве Гуглам и не успевам да најдам ништо, навистина, ама баш ич не ми е јасно зошто ЗНМ се истрча?
Но, очигледно тоа ќе е мачна дебата, со уште помачни судири на аргументи.
