Возач на патничко моторно возило, сопатник и еден велосипедист биле тешко повредени во две од вкупно 18 сообраќајни несреќи што се случиле изминатиот викенд на подрачјето на СВР Скопје. Во пет сообраќајки полесно биле повредени седум лица, а во 11 била причинета материјална штета.
Од СВР Скопје информираат дека викендов сообраќајната полиција санкционирала 113 возачи кои се движеле со брзина поголема од дозволената, а од сообраќај исклучила 36 возачи кои го управувале возилото под дејство на алкохол, 58 возачи пред да се стекнат со право на управување моторно возило и четворица почетници, како и 40 нерегистрирани возила и едно технички неисправно возило.
Санкционирани биле и 14 возачи кои поминале на крстосница на црвено светло, шест возачи не дале првенство на минување на обележан пешачки премин, еден возач за неправилно престројување, четворица возачи за неправилно престигнување, девет за не користење заштитен шлем од страна на возачите на велосипед со мотор, мопед и мотоцикл, 15 возачи за не носење сигурносен појас, како и 17 возачи кои користеле мобилен телефон за време на управување на моторно возило.
Еден пешак поминал коловоз вон пешачки премин.
Затекнати биле 195 возила непрописно паркирани, а со помош на специјалното возило „пајак“, отстранети биле 140 возила.
извор: МИА
