пишува: ЈАНЕ ЃОРЃИОСКИ
Знаете ли како звучи кога само ќе се спомне дека некој добил од државата пари во илјадници евра без разлика за колкав временски период е тоа и за каков ангажман? Тоа кај нас, за жал, одма одекнува како некој да ја опљачкал државата 17.000 евра и се шета слободен додека луѓе за украдени „10 ќебапи“ скапуваат во затвор. Но, да не се потценуваме, вие добро знаете како звучи тоа, токму затоа сте го пишале текстот и сте ставиле таков наслов.
Зборот ми е за текстот на Фактор со наслов „Советнички услуги: Мирослав Грчев за две и пол години од Влада и од Култура добил 17.000 евра?“
И одекнува таа цифра од 17.000 евра и мме си вели на прва секој нормален човек – ја опљачкаа државава, за кој курац бе ние…
Значи УАУ?!
Ако ги поделиме тие 17.000 евра на 2,5 години (30 месеци), испаѓа една фантастична сума од 566 евра или околу 35.000 денари месечно, што ја земал професорот Грчев од државната каса за овие две и пол години за советување на Премиерот и министерот за култура и за изработка на неколку закони!
Н.Н.Ф. (Нина Нинеска Фиданоска) е потпишана под овој истражувачки текст на Фактор, а потоа истиот текст е пласиран како ексклузивитет и е расфрлен низ сите визбански медиуми. Да, има сè како што треба: веродостоен документ од „одредени наши извори“, посочување дека ставовите од професорот се блиски на сегашната власт, а критички кон поранешната, посебно на проектот „Скопје 2014“, неговата улога во Шарената, каде е вработен неговиот син, секако има и прашалник на крајот од насловот, за секој случај нели, евентуално…
И, ич нема да навлегувам во тоа дали е етички или не да се објави оваа инфомација, вие сте доволна искусна новинарка, сте биле Уредник и на Утрински весник. Баш скоро ми допадна во рака вашиот едиторијал, каде ракоплескате за затворањето на Велија и А1 ТВ. Извонредно колегијално, браво.
Ич нема да навлегувам ни во тоа дали професорот од Архитектонскиот факултет ги заслужил тие фантастични месечни хонорари.
И да, супер ви е и крајот од постот каде го спомнувате и синот на Грчев, во супер „ненаведувачка конотација“, многу искусно и со сенс, мора да се признае.
Не, овде нема лажна вест, нема ни говор на омраза. Овде има одлично наведување.
Алал истражувачко новинарство, одлично теледиригирано!
