Тајниот агент на АХА! дојде до во моментов најстрого чуваната тајна во Белата палата!
Ова е демо верзијата од тајмерот што одбројува кога точно ќе биде прикажана партиската изборна програма на ВМРО-ДПМНЕ за претстојните Парламентарни избори, кои ќе се одршат на 12 април 2020 година.
Кога тајмерот ќе одброи „0-0-0-0“, автоматски ќе се отвори сефот изработен во Будимпешта специјално за оваа намена, во кој се чува изборната програма и одма после тоа ќе биде објавена во јавноста. Еднаш кога ќе биде поставен тајмерот, потоа не може да се ресетира, му откриле вмронските извори на агентот од АХА. Датумот е 12 април 2022 година кога сефот ќе се отвори и конечно оваа најстрого чувана тајна од јавноста ќе го добие светлото на денот. Лидерот Мицкоски веќе во неколку наврати рече дека програмата е во изработка и да се стрпиме за нејзиното објавување, но искрено многу сме збунети за годината на објавувањето.
Македонските избирачи се во најголема неизвесност од историјата на државата до сега, за да видат кои се фантастичните проекти кои ќе ги понудат Жмицко енд компани, за спас на државата од клетите предавници. Дали во програмата стои дека ќе ја исправат неправдата и ќе го изградат ветеното Панорамско тркало, ќе го потераат ли часовникот на старата железничка станица, ќе го изградат ли конечно парапетчето околу Охридското езеро? Ова се само три од многуте очекувања што ги имаат трпеливите граѓани.
Но, како што гледаме од тајмерот, најверојтно ќе треба да се стрпат до 2022 година.
Дали ЖМицко политички ќе преживее до 12 април 2022 година за да конечно ни ја прикаже ветената изборна програма, останува допрва да видиме.
Зошто датумот е 2022 година?
Дали е саботиран тајмерот, или тоа се вистинските капацитети?
Кој го саботирал тајмерот во Белата палата?
Дали е тоа синот на Сорос? Можно ли е повторно несмасниот Влатко Ѓорчев да ги помешал копчињата и пресметките, како безброј пати до сега и ја утнал годината?
пишува: РИБАРО
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
