Во последниве три дена се случија два сериозни инциденти, на членови на семејствата на функционери на владејачката СДСМ, односно врз нивниот имот.
Имено, според полицискиот билтен, во четвртокот, мета на крадци бил домот на пратеничка на СДСМ.
-И.С. пријавила дека на ул.„Мирослав Крлежа“ во Скопје насилно е отворена влезната врата од станот, е наведено во полицискиот билтен. Од МВР велат дека уште се работи на случајот и утврдување на точната ситуација.
Во Кочани, пак, среде бел ден обид за киднапирање на седумгодишно девојче – ќерка на пратеник на СДСМ, се случил во вторникот. Додека девојчето се враќало од училиште го пресретнало возило со странски регистарски таблички, а непознати лица му наредиле да влезе во автомобилот. Во тој момент дедото на малолетното девојче ги забележал па тие побегнале.
МВР го потврди случајот и соопшти дека се приедени две лица на возраст од 18 години кои со патничко возило „БМВ“ се движеле низ улиците по градот и вознемирувале граѓани.
-Лицата се приведени во полициска станица Кочани, а за случајот е известен јавен обвинител – стои во соопштението на МВР.
Пред неполни два месеца, пак, во штипската населба Сењак, на улицата „Борис Крајгер“ рано утрото беа опожарени пет возила, од кои три целосно, а две делумно.
Меѓу трите целосно изгорени возила беа автомобилите на Никола Тушев, поранешен претседател на ОО на СДСМ Штип и на неговиот татко Мите Тушев, инаку брат и татко на поранешната пратеничка од СДСМ, Маринела Тушева.
Никола Тушев, тогаш рече дека настанот се случил по 5 часот утрото, а дека неговото возило и возилото на неговиот татко биле паркирани на две оддалечени места на паркингот, а палењето било извршено со молотови коктели.
Неодамна, откако градоначалникот на Скопје, Петре Шилегов, купи и на повеќе локации во градот постави нови, погабаритни контејнери, за многу кус период беа запалени дел од нив. Во јавноста се проширија гласини дека и дел од тие опожарувања на контејнери се израз на револт на политичките неистомисленици.
Дали овие случаи на загрозување на безбедноста на функционерите на СДСМ, но и на нивните најблиски ќе останат само изолирани случаи останува да видиме, а со оглед на тоа што сме далеку од најавените предвремени парламентарни избори, на органите на редот е да откријат дали имаат некаква политичка заднина, но и да ги спречат во иднина.
Б. Богдановска
