ПремиеротЗоран Заев и лидерот на ВМРО-ДПМНЕ, Христијан Мицкоски сè уште не се договорија за предлогот на опозицискиот лидер за технички министер за внатрешни работи. Во јавноста се лицитира со името на полковникот Драган Ковачки.
Армискиот полковник Драган Ковачки е предлогот на ВМРО-ДПМНЕ за технички министер за внатрешни работи, дознава Телма. Полковникот Ковачки во моментот е нераспределен во служба во АРМ, а неговото име беше во последните унапредувања на поранешниот претседател Иванов. Ковачки тогаш беше назначен за командант на Првата механизирана пешадиска бригада со база во касарната Петровец, но таа функција ја обавуваше само неколку месеци, објави Телма.
Унапредувањата на Иванов, меѓу кои и на полковникот Ковачки беа поништени од новиот претседател Пендаровски. Антикорупциска комисија покрена постапка за Иванов бидејќи ги унапредил офицерите на повисоки позиции откако биле распишани избори.
Полковник Драган Ковачки има завршено повеќе школи, курсеви и бил на повеќе усовршувања. Пред да стане командант на бригадата бил во Министерството за одбрана односно бил раководител на Воената служба за безбедност и разузнавање. Ковачки има учествувано и во мисии во Авганистан и во Ирак како припадник на АРМ. Добитник е и на повеќе воени признанија.
Еве што пишува во биографијата за Ковачки, која ја објави телевизијата „Алсат-М“:
Бил командант на 1. механизирана пешадиска бригада, началник на секција за операции и борбена готовност во 1. механизирна пешадиска бригада.
Бил раководител на Секторм – Служба за воена безбедност и разузнавање во Министерството за одбрана.
Бил началник на одделение за контраразузнавање во воената служба за безбедност и разузнавање.
Бил офицер за разузнавање и вршител на должност началник на секција за безбедност и разузнавање во полкот за специјални операции.
Бил офицер за специјални операции и за разузнавање во мисија Слобода за Ирак-1 и командир на противтерористички тим во 6. одред и други функции.
Одликуван е со признанија за својата работа како што се: Плакета на АРМ за учество во мисија „Слобода за Ирак-1“, Пофалница за остварени резултати во процесот на борбена обука и воспитување, медал на командно-штабната школа во Р. Хрватска.
Родител е на две деца и е од Скопје.
