Во неколку градови на Црна Гора и синоќа продолжија протестите против усвојувањето на нацрт-законот за слобода на вероисповеста, јавија црногорските медиуми.
Во Подгорица литијата низ улиците ја водеше митрополитот црногорско-приморски Амфилохије.
По молебенот, литијата тргна низ улиците на Подгорица во 19 часот од Соборниот храм до црквата Свети Макавеј во Толоши и се врати во храмот, пренесува РТЦГ.
Митрополитот Амфилохије се обрати на верниците со порака дека ништо не може да се изгради на основа на беззаконие и дека храмовите се божја сопственост.
Во Беране неколку илјади граѓани, меѓу кои и градоначалникот Драгослав Шчекиќ и голем број локални функционери, се собрале пред општинската зграда, извикувајќи „Не го даваме тоа што ни е свето“.
Синоќа протестираа и голем број жители на Жабјак и Бјело Поле.
Протоереј ставрофор Милан Станишиќ ги повика верниците да бидат достоинствени во протестите против донесување на законот за вероисповест, да ги слушаат своите епископи и митрополити и да го прават тоа што тие го благословуваат.
Власта и опозицијата имаат различни ставови околу Законот за верските заедници.
Црногорската опозиција и СПЦ остро се спротивставуваат на усвоениот закон, бидејќи со него се бара од верските заедници да покажат доказ дека уште пред 1918 година го поседуваат нивниот имот. Законот предвидува сите објекти и земјиште за кои нема докази за правото на сопственост да станат државна сопственост. Со најголем дел од црквите, манастирите и верскиот имот во Црна Гора располага СПЦ.
Инаку, Законот беше донесен на 27 декември 2019 година.