Се погласни се најавите од опозициската ВМРО-ДПМНЕ во предизборието за ревидирање на Договорот од Преспа, со кој на Република Северна Македонија ѝ се овозможи членство во НАТО, а ѝ го отвори и патот кон Европската Унија.
Со овој Договор се реши речиси тридецениски спор со Грција, при што на името Македонија се додаде придавката Северна.
Во неколку наврати претседателот на ВМРО-ДПМНЕ, Христијан Мицкоски, најави дека доколку на предвремените парламентарни избори во април годинава, неговата партија ја добие власта (со најмалку 80 пратеници), тие ќе го менуваат договорот. Никогаш до крај не објасни, што значи тоа.
„Најавите на ВМРО-ДПМНЕ дека се залагаат за поништување на Договорот од Преспа се директна закана за нашето полноправно членство во НАТО, тоа ја загрозува интеграцијата во ЕУ и иднината на државата. Столчето во НАТО коешто не очекува е столче за Република Северна Македонија – 30 тата земја членка на Алијансата, на најмоќниот сојуз во светот“, истакна денеска Костадин Костадинов портпарол и пратеник на СДСМ.
„Без Договорот од Преспа тоа наше столче во НАТО не беше можно. Во период кога во Шпанија започнува последната ратификација на протоколот за наше членство во НАТО, ВМРО-ДПМНЕ се заканува со ревидирање односно поништување на Договорот од Преспа. ВМРО-ДПМНЕ треба да објасни зошто се овие закани против Договорот, зошто се овие закани против нашето членство во НАТО? Затоа што ако нема Договор од Преспа-нема ниту членство во НАТО“, додаде Костадинов.
Тој ја повика целата демократската јавност, заедно со сите политички и граѓански демократски капацитети да гарантира дека Договорот од Преспа ќе создава иднина за нашата земја, иднина што значи членство во НАТО и преговори за членство во ЕУ со заштитен македонски идентитет.
Секако, Преспанскиот договор, постигнат пред нешто повеќе од две години, забележително е една од главните точки на препукување во предизборието, а најверојатно ќе биде топ тема до 12 април, а и потоа.
Иако со овој договор се отвори патот за членството на земјата во НАТО и за почеток на преговорите со Унијата, за очекување е дека власта и опозицијата и во оваа изборна кампања ќе се надмудруваат за неговите предности и слабости.
И претседателот на СДСМ, Зоран Заев, вчера изјави дека укинувањето на Договорот од Преспа со Грција, кое го најави ВМРО-ДПМНЕ, ќе биде опасно и може да ја врати земјата 25 години назад, иако пак, не верува во победата на ВМРО-ДПМНЕ на овие избори, а уште помалку дека партија ќе освои 2/3 мнозинство во парламентот за евентуално да може да интервенира во Договорот.
„Дали ВМРО-ДПМНЕ се свесни што ќе се случи ако се уништи Преспанскиот договор? Укинувањето би не вратило 25 години наназад, и би го вратило ПЈРМ односно ФИРОМ, име со кое бевме именувани на сметка на уставното име. Тоа ќе значи укинување на членството во НАТО, губење на ЕУ перспективата, губење на милијарда евра инвестиции“, додаде Заев вчера на прес-конференција.
Речиси експресно, одговор стигна од ВМРО-ДПМНЕ, преку нивниот потпретседател Владо Мисајловски, кој рече дека тие не се закануваат, туку го кажуваат она што го мислат граѓаните и тие како политички субјект.
„Не се закануваме по никого сакаме да имаме пријатели насекаде, но се разбира не треба да се срамиме од тоа што сме и никогаш нема да се срамиме. Ние сме Македонци и ќе останеме Македонци каде и да сме“, изјави Мисајловски.
Сепак, ВМРО-ДПМНЕ, на Референдумот за името во 2018 година, некаде пред 30 септември, премолчано го прифати Преспанскиот договор, иако во позадина работеше на бојкотирање на целиот референдумски процес: Се чини дека опозицијата водеше кампања како да се оди на парламентарни избори, а воедно водеше и кампања за бојкот на теренот.. “ (Жестоко спротивставени кампањи и длабоко поделено општество, ЦИВИЛ Медиа, 27 спетември 2018)). Голем дел од познатите челници во партијата одлучија да гласаат на референдумот. Во тој период се формираше и Независната пратеничка група на ВМРО-ДПМНЕ, која во Собранието гласаше за уставни промени согласно Преспанскиот договор.
Употребата на Преспанскиот договор во политичка кампања не е ништо ново, имајќи во предвид дека тој беше неразделен дел од реториката и во предизборната кампања за претседател на изборите одржани во 2019 година.
Б. Богдановска
