По анализа на целокупната документација, Државната комисија за спречување на корупцијата утврди дека нема судир на интереси во предлогот на Владата, министерката за правда Рената Дескоска да биде член на Венецијанската комисија.
„Според статутот на Венецијанската комисија, таа е составена од независни експерти, но она што е најважно во статутот е предвидено дека членовите не ја претставуваат ниту земјата, ниту институцијата од каде доаѓаат и тие воопшто не учествуваат во расправата и гласањето поврзано со земјите кои ги претставуваат. На ваков начин сметаме дека Венецијанската комисија сама се има заштитено од судир на интереси”, посочи претседателката на комисијата за спречување корупција Билјана Ивановска.
ДКСК ја отфрли претставката како неоснована, а не е утврден прекршок ниту во начинот на предлагање на Дескоска како претставник на Северна Македонија во Венецијанската комисија.
Овој предмет ДКСК го отвори по допрен глас од медиумите, но и по претставка поднесена од политичка партија.
Министерката за правда Рената Дескоска, кон крајот на минатиот месец, преку Фејсбук објави дека Венецијанската комисија ја прифатила нејзината номинација за член на ова тело.
– Тоа е потврда дека се исполнети критериумите за членство во комисијата. Благодарам за довербата, напиша Дескоска.
Дескоска е прва членка на Венецијанската од Македонија од позиција министер за правда. За членови на Комисијата досега се предлагаа експерти од правната област. Пред Дескоска, член на венецијанската комисија беше професорката од Правниот факултет Тања Каракамишева.
Б.Б.
