коментира: ЈАНЕ ЃОРЃИОСКИ
Претседателот на собранието Талат Џафери ја прекина и ја одложи собраниската седница на која требаше да се гласа Законот за Јавно обвинителство, за утре во 11 часот.
Таквата реакција на Талат Џафери се случи, откако пратеникот на ВМРО-ДПМНЕ Илија Димовски се приближи до говорницата и на Џафери му покажа нешто од својот мобилен телефон.
По овој случај, Џафери реагираше на пост на Фејсбук од секретарот на СДСМ Љупчо Николовски, кој претходно напишал дека можат да обезбедат ново мнозинство и нова влада која ке ги организира редовните парламентарни избори.
После „прегратката“ Џафери-Димовски, реакциите на социјалните мрежи се бурни:
– „Се појавија со вистинското лице и си ја обновија коалицијата“. „Ете им го природниот партнер во криминалот што го правеа заедно 11 години“. „Криминалната коалиција ДУИ – ДПМНЕ на дело“. „Се обнови злосторничкото здружение ДУИ – ДПМНЕ“, „ДУИ во прегратка со ДПМНЕ, Талат во прегратка со Илија, колку природно тоа изгледа“ се само дел од постовите што може да се прочитаат на Фејсбук и Твитер.
Секретарот на СДСМ Љупчо Николовски се огласи на Фејсбук (на што и реагираше Џафери):
„Доколку во Собранието се продолжи со тактизирање и ако на било кој начин се оневозможи гласање на важните законите, а особено Законот за јавно обвинителство, изборниот законик, Законот за одбрана разрешувањето на Мизрахи… во тој случај постои реална можност ние да направиме ново парламентарно мнозинство, а потоа и нова стабилна влада која ќе организира редовни парламентарни избори“
Со пост се јави и пратеникот на СДСМ Мухамед Зекири:
„Талат и ДУИ уште еднаш го покажаа нивното вистинско криминално лице заедно со нивните побратими од ВМРО ДПМНЕ. ДУИ И ВМРО ДПМНЕ ја обновија нивната криминална коалиција и коалиција на тесните интереси на одредени кругови во нивните редови. СРАМОТА!!!“, напиша Зекири
Дали се крчка ново мнозинство? Математиките велат дека тоа е можно. Ако се собере внимателно, се доаѓа до бројка од 65 пратеници. Но, од друга страна, може ли да се потпре коалицијата на еден пратеник каков што е Крсто Мукоски, е исто така интересно прашање. Им прекипе ли конечно на СДСМ од сите заврзлами што им ги спремаа ДУИ во очигледна координација со блискиот им поранешен партнер ВМРО-ДПМНЕ, останува да видиме. Кој би бил одговорот на меѓународната заедница на еден ваков евентуален развој на настаните е исто така мошне интересно да се знае.
Утре ќе биде многу интересен ден.
