Претседателот Стево Пендаровски вечерва прогласи вонредна состојба во државата. Ваквата одлука е донесена, како што рече во обраќањето до граѓаните, за поефикасно справување со корона вирусот.
Вонредната состојба ќе трае 30 дена. Во тој период Владата до Пендаровски ќе треба да поднесе извештај за ефектите од донесените мерки за заштита против корона вирусот, дневно да го информира за преземените активности и за ажурираните планови за постапување во иднина.
Владата ќе продолжи да функционира како техничка.
Воведување вонредна состојба побара Владата, а со таков став претходно излегоа и лидерите на СДСМ и ВМРО-ДПМНЕ, Зоран Заев и Христијан Мицкоски.
Што вели Уставот за воведувањето на вонредна состојба:
Член 125
Вонредна состојба настанува кога ќе настанат големи природни непогоди или епидемии. Постоењето на вонредна состојба на територијата на Република Македонија или нејзин дел го утврдува Собранието по предлог на претседателот на Републиката, Владата или најмалку 30 пратеници. Одлуката со која се утврдува постоењето на вонредна состојба се донесува со двотретинско мнозинство гласови од вкупниот број пратеници и има важност најмногу 30 дена. Ако Собранието не може да се состане, одлука за постоење на вонредна состојба донесува претседателот на Републиката и му ја поднесува на Собранието на потврдување штом тоа ќе е во можност да се состане.
Член 126
При постоење на воена или вонредна состојба Владата во согласност со Уставот и со закон донесува уредби со законска сила. Овластувањето на Владата да донесува уредби со законска сила трае до завршувањето на воената или вонредната состојба, за што одлучува Собранието.
Член 127
За време на воена состојба, ако Собранието не може да се состане, претседателот на Републиката може да ја именува и разрешува Владата и да именува и разрешува функционери чиј избор е во надлежност на Собранието.
Член 128
Мандатот на претседателот на Републиката, Владата, судиите на Уставниот суд и на членовите на Републичкиот судски совет се продолжува за време на траењето на воената или вонредната состојба.
Со прогласувањето на вонредна состојба Владата сега ќе има простор да донесува уредби со законска сила без тие да поминат низ законодавниот дом. Тоа значи дека сега сите одлуки кои што ќе ги донесе Владата ќе може веднаш да се ефектуираат, а тоа би значело поитно и поефикасно справување со заразата. Владата ќе може да ги ограничи и некои човекови права како што се слободата на движење, но тоа како што истакна претседателот Пендаровски, ќе се ограничи само ако е потребно.
Економски како што потенцираше претседателот Пендаровски со воведувањето на вонредната состојба, државата би требало да ги помогне компаниите кои се директно погодени од корона кризата.
Во ситуација кога се замрзнати сите цени на основните прехрамбени производи, и имаме редовно и навремено снабдување на маркетите со сите потребни намирници, не се очекува друга интервенција во оваа насока, барем не во овие 30 дена.
Ј. Ѓ.
