Европскиот комесар за проширување Оливер Вархеји, на прес конференцијата преку видео линк што ја одржа попладнево изјави дека неговиот план е преговарачката рамка да му биде презентирана во јуни на Советот, по што ќе може да се одржи првата меѓувладина конференција.
Поради условите во кои се одржуваат прес конференциите во контекст на карантин во Брисел, пресовите не се држат повеќе во живо, туку преку видео конференција.
Изјавата на еврокомесарот што се однесува на датум на почетокот на преговорите, односно поднесувањето на преговарачката рамка, услов за одржување на меѓувладината конференција, беше нејасна поради лошата интернет конекција.
-Ќе почнеме сега многу брзо да ја подготвуваме рамката, треба да седнеме со двете земји, планираме да го ставиме ова на дневен ред на Советот најбрзо што може, односно јуни, изјави Вархеји.
По денешната одлука на Советот за општи работи да се отворат преговорите со Албанија и Северна Македонија, Европската Комисија има сега задача да изготви преговарачка рамка – земјите кандидати имаат иста таква обврска од своја страна. Штом таа рамка биде финализирана, им се поднесува на земјите членки кои треба да ја одобрат, со што се отвора патот за одржување на првата меѓувладина конференција.
Со оваа изјава јасно е дека Европската Комисија има зацртано датум за почеток на преговорите, веднаш по објавувањето на редовните извештаи за реформскиот напредок, предвидено во мај.
Еврокомесарот на денешната прес конференција не сакаше да лицитира со тоа која земја прва би го отворила првото поглавје, бидејќи, како што рече тој, сѐ зависи од реформскиот напредок во секоја од земјите. Тој оцени дека не е исклучено Албанија да ја “претрка“ Северна Македонија, или пак двете истовремено да ги отворат поглавјата.
