СДСМ со соопштение до јавноста: Обезбедени се бескаматни кредити за компаниите погодени од кризата, време е за солидарност и меѓусебно помагање

За кризата побрзо се надмине потребни се уште посилни и уште поефикасни економски мерки, насочени кон заштеда и поголема помош за граѓаните, затоа СДСМ излезе со низа мерки како да се справи економскиот систем со ударот од пандемијата.

„Соопштение за јавност

Државата, институциите остануваат посветени на спречување на ширење на корона вирусот, но и намалување на негативните ефекти врз економијата.

СДСМ како одговорна партија водена од интересите на граѓаните и државата, веќе предложи низа мерки за справување со економските последици од корона вирусот.

Владата веќе ги донесе првите мерки кои имаат за цел да им помогнат на граѓаните и стопанството полесно да се справат со штетите предизвикани од корона вирусот.

Развојната банка на Северна Македонија веќе објави јавен повик за доделување бескаматни кредити на микро, мали и средни претпријатија погодени од кризата. Компаниите ќе имаат можност да добијат бескаматен кредит од 3 до 30 илјади евра со грејс период од 6 месеци.

Со Уредбата со законска сила за начинот на промена на договорни услови на кредитни изложености кај банките и штедилниците, се олеснува финансискиот товар на граѓаните и на фирмите коишто заради корона кризата се соочуваат или би можело да се соочат со реални потешкотии во исплатата на кредитите во банките и штедилниците.

Извршителските дејствија се ставени во мирување до 30 јуни.

За кризата побрзо се надмине потребни се уште посилни и уште поефикасни економски мерки, насочени кон заштеда и поголема помош за граѓаните.

Потребно е солидарно намалување на платите на функционерите, министрите, раководителите, градоначалниците, директорите и на вработените во јавниот сектор на 14.500 денари во месеците април и мај.

Претседателите и членовите на Советите во општините и претседателите и членовите на Управните и Надзорните одбори на институциите да не земаат надоместоци за месеците април и мај.

Сите средства од оваа заштеда да одат во фонд за справување со кризата од каде ќе им се помага на работниците и стопанството.Време е за солидарност и меѓусебно помагање. Само така побрзо ќе се надмине економската криза која е последица на корона вирусот.“ – пишува во соопштението од Социјалдемократскиот Сојуз на Македонија.