Адвокатот Жарко Стеваноски остро реагираше поради постапката со службените печати на СОУ „Крсте Петков Мисирков“ – Демир Хисар, за кои, како што вели, надлежните институции постапиле спротивно на законот.
„Откако ОЈО Битола на ден 13.08.2025 година ги одзеде службените печати на СОУ ‘Крсте Петков Мисирков’ Демир Хисар како доказ по кој ОВР Демир Хисар до пред распишување на локалните избори 2025 година ревносно трагаше заради постоење на основано сомневање дека ‘неподобната’ директорка Маја Лозановска сторила кривично дело ‘Одземање или уништување на службени печати или списи’ од чл.390 од КЗ, а после распишување на изборите го изгуби интересот за печатите“, напиша Стеваноски на својот Фејсбук профил.
Тој објаснува дека од јавниот обвинител било побарано печатите да ѝ се вратат на актуелната директорка Лозановска, со укажување на законската обврска од Изборниот законик, според кој постапката за разрешување и именување директори се прекинува до завршување на изборите.
„Но, очигледно јавниот обвинител нашол соломонско решение и одлучил спротивно на Законот за кривична постапка службените печати да ги врати на основачот – Општина Демир Хисар, односно на градоначалникот, а тој, тој сосема непресметливо ги предал на новоназначениот в.д директор да си направи промена во Централниот регистар и да се устоличи како директор во екот на распишани избори“, реагира адвокатот.
Според него, со оваа одлука „целосно множејќи ги забраните предвидени со изборниот законик со нула“, на 25 август била извршена промена во Централниот регистар за директор на училиштето.
Стеваноски посочува дека јавниот обвинител ги одзел печатите врз основа на „сомнително издејствувана наредба за претрес“ од судија при Основниот суд Битола.
„Јавниот обвинител бил должен да знае дека враќање на одземените предмети може да дозволи само Основен суд Битола, а не самиот јавен обвинител. Тоа е дефинирано во чл.119 ст.3 и чл.203 од ЗКП“, вели тој.
На крајот, адвокатот заклучува: „Вака како што тргнала работата, изгледа дека законите не важат ниту за ОЈО Битола, ниту за Општина Демир Хисар кога се работи за именување и разрешување на функционери за време на избори, па останува да се надеваме дека некој од другите надлежни органи ќе ја постави точната дијагноза на состојбата и ќе препише соодветна терапија против непресметливата ситуација час поскоро“.
Поврзано:
